Punjab police-i VIP tem nem lemzüktsüba police 800 agienogo

New Delhi, March 31 (Agencies): Punjab nung security aguja aliba reprangshiba sülen state police-i yimtenren lenirtem densema kanga tongtibang nisungtem nem security lemzükja aliba police 800 shi agienogo.
Hokolbarnü Chandigarh nung police tongti ketdangser kati, “Tongtibang nisungtem nem security atema lemzükja aliba police 800 shi agienogo. Amokmeren aliba, intelligence osang aser inyakyim nung ajemdaker security reprangshia liasü,” ta metetdaktsü.
Ajisüaka ‘Z plus’ aser ‘Y plus’ security cover agüja alibabo maneni akhi ama alitsü, ta paisa ashi.
Taoba SAD-BJP sorkar yimsüsüba mapang yimtenren lenir aika nem inyakyim alema police security agüja liasü.
Tang Congress-i aniba sorkar tasenbai VIP inyakyim anentsüogo, aser tang yimtenren lenirtem aika security agientsür.
Captain Amarinder Singh-i anir sorkar tasen akumba sülen Director General of Police, Suresh Arora-i DGP (law and order) Hardeep Singh Dhillon mendenbuba ser state-level review committee (SLRC) ka tenteta liasü, aser iba ludeni state police-i tongtibang nisung aika nem security agüja aliba reprangshi.
Security reprangshiba Interim report ka aser supplementary reports ana Punjab DGP ket nung agutsüogo, ta ketdangserisa ashi.
Iba committee nung tanga züngsemtemji- ADGP intelligence Dinkar Gupta, ADGP security BK Bawa member secretary aser IGP (special protection unit) Pramod Ban nunger liasü.