Punjab sorkari ‘VIP culture’ anendaktsütsü

Chandigarh, March 18 (Agencies) : Honibarnü Punjab nung Amarinder Singh-i aniba sorkari state nung ‘VIP’ inyakyim anendaktsütsü atema sorkar garitem nung beacons mamshitsü, küm ana atema minister tem bendangleni maotsü aser state senpong nungi sen agiteta lokti chiyungba sentongtem mayongzüktsü telemtetbatem agiogo.
Ambulances aser fire brigade amala ‘emergency services’ aser Punjab o Haryana High Court nung Chief Justice aser obendangertem indang garitem nungdang beacons amshitsü, ta sorkar otongdar kati ashi.
Tanü Punjab nung Council of ministers mezüng cabinet senden nung VIP inyakyim anendaktsütsü atema item telemtetbatem agi, ta paisa ashi.
Cabinet-i garitem nung red beacons aser tanga sentsütem mamshitsü, küm ana atema minister aser MLA ajak bendang linüktemi maotsü aser sorkar senpong nungi lokti chiyungtepba sentongtem mayongtsü atema telemtetba agi, ta otongdarisa metetdaktsü.
Minister mesüra MLA kar official mapa atema bendang linüki aotsüsa mapang ajurura mesüra aotsü lemzüktsüra, idangjiang temelaba agütsütsü. Maneni garitem nung beacons amshiba indang inyakyim tasen ka metetdaktsütsü, ta paisa ashi.
MLA temi pei pei indang itasen, allowances aser reimbursements tem itashia official website nung yimjak nung sayutsüla. MLA aser MP temi kümshia January 1 nung parnok indang rongsen metetdaktsütsüla aser 2017-18 atema parnoki July 1 tashi nung iba osang yimjak nung metetdaktsü tetuyuba agütsüogo, ta sorkar otongdarisa shisem.
MLA aser Minister temi nüngshilung azüngtsüba aser lapoktsüba atema inyakyim kar lateta metetdaktsütsü. President, Vice-President, Lok Sabha Speaker, Union Ministers, Chief Minister, assembly Speakers aser state minister temi dang nüngshilung azüngtsü, ta otongdarisa metetdaktsü.
Chief Minister mesüra minister kati semdangyonga district administration tem akhi ama dang pei teinyaktsü mapa inyaktsü. VIP kari ketdangser indang nübo aginüra, jelia bangdak ketdangser ket nungi temelaba meshitsüla, ta paisa ashi.
Maneni tanü senden nung cabinet-i Punjab nung aliba state highway ajak nung osangbener dang nungibo ‘toll tax’ magitsü atema telemtetba agi.