Punjab Warriors-i Hockey India League 2016 kokogo

Ranchi, February 21 (Agencies): Hockey India League (HIL) asayamung nung tesüiba küm ana atonga atonga final asaya nung tamakok anguba sülen Jaypee Punjab Warriors-i tan Birsa Munda Hockey Stadium nung Deobarnü final asayadang gold medal nguogo.
HIL ya tan agi pezüben buba asayar aser iba asayamung nung team troki shilem agir.
Chandigarh nungi asayartemi Kalinga Lancers telok madak 6-1 agi takok angu. Iba final asaya nung Armaan Qureshi, Matt Gohdes aser Satbir Singh nungeri field goal ka ka yoka liasü.
Lancers telok nungi captain Moritz Fuerste par telok asoshi penalty corner agidang goal ka yokba dak alaka tanga goal ka danga meyokteti iba asaya tembang.
Iba asayamung nung field goal ajak goal anana ta züngshir.
Warriors telok nungi forward nung asayar Armaan Qureshi asaya tenzüker minute pezübuba nung mezüng goal yok aser iba goal zünga asayamung rangben nung pai goal pezü yok.
Final asaya jakdang 2014 küm takoker Delhi Waveriders-i 2015 küm koka alir Ranchi Rays madak 2-0 agi takok ngua tasembuba jenjang nguteta bronze medal angu. Iba asaya nung Mandeep Singh-i field goal ka yokba ajanga asayamung nung tasembuba jenjangji ngutet.