Pusem O Medenlok

–  P. Renthy Jamir.

Tir Yimyim adok 29th May, 2019 nung Y. Yimti Tzüdir aser Rev. S. Temjen Longkumer tena onük balala sür olemsabang nung züluba onük anato külemi junga züluogo ta Pusem O tatsütsü medenloka bilemba lemsar.

1) Mezüngbuba Y. Yimti Tzüdir onük – Ao oshi nung Dictionary ka Ojang Teimba Enoka Adoktsü kü Tangatetba Lemsateper. Pai ashir, “Iba osep kanga junga adokogo ta nia agizüker (AROK OSEP).” Saka paisa Dr. Clark kanga mazüngi mapa aika liaka pai Ao Naga Dictionary tapak 977 aser ojang 11,940 adok. Aser tawa ASLBA-i AROK OSEP tapak 310 ojang 7,050 adok ta ashir. Ano pai ashiba kaji zülumen (spelling) tamalen Ao Dictionary aser Ao osep adokba den meputep (Kechiyong adok shia spelling balala asübaji kenyongi tim masü). Süra pa o ya o sükyi agi jembir mesük, haubo hau saka nonga asüba agi akoker.
Tang adokba AROK OSEP ya ni asadangtetbabo tabensaba bushidang mabensaba entok. Tetezü ojang ajak bushitsü memerang, saka ishikaji sobu tabensa Tenem ozü ama parts of speech den ola osü pronunciation phonetic teperi den English oshi nung teratet shitak agüja adok. English Dictionary tulu OXFORD, Chambers Dictionarytem nunga yamala ola osübo ojang ajak nungbo agüja mali. Anungji AROK OSEP ya Nokleni or Tzüleni mao ta ashitsü akok. Aser iba metokmeperi mabensaba ya teinyaker tai ta nongloktsütsü kecha madoker. Kechiyong inyaktsüpur Luden shima yutsür Ita Anogo küm mapang onsara tatsüka dang agütsü. Shibo Pound ka wazükang Azübo tzüjang kata teyimtokdaktsü ta asüba ama yakta tekaraba nung Ao osep tabensa ka adoktsü nongloktsübaji tim masü. Nibo anaben tashi Webster English Dictionary küm 36 nungang renemtet ta tashi atishia mariteptsüla tasa züluogo. Aser ya teinyakerbo ojang 7,050 masü saka 14,100 bushia inyak (AooX English).
Ano AROK OSEP azüngertemi junga mazüng sür junga adokogo ta mashitsüla. Nisung karbo lokti nung tajung taginüla lir, saka Dictionarybo tila ka ojang ishika sür ayangayanger tajunga ta Jempongnu ozü junger – junger ta miimshija meitreptsüba amaji masütsüla. Anungji teinyakertemi nübur iba OSEP azünger ajakdang metokmeperi mabensaba ajak tuteta sayutsü tamasayongi ayongzükogo. Aser ya kar atema dang masü ajak atema lir. Anungji tang adokba nung ya ajemdaker Angami, Lotha nunger oshi Dictionary amaji ojang Lakh tema masüyonga ojang meyirijang roker tenem ka shi danga AO OSEP ta sür Ao oshi temeja nung adoktsü ajaki nongita yariteptsula. Aser iba mapa malensüa ajaayangertemji English oshi metetertem dang masü asen Ao oshi metetertema dendaktsütsüla ta tezülur den pusema tebilemba zülur.

2) Tanabuba onük nung Rev. S. Temjen Longkumeri Ao Senden Literature Board (ASLB) indang Rajem O tatsüka ta sür züluba ya kanga junger ta agizüker. Pai ashiba ama tamalen asen lenirtemi Literature ratet Ao oshi nung kaket keno ta sür küm aika amshia aru. Kechiyong Literature tetezü – Kaket keno züluyim ta, kaket keno züluba maparen ta lir. Aser tang ASLB-i asen Ao oshi temelenshiba terenlok nung takok tulu ngua bener aor. Anungji iba Mungjen tamendakdak nüngjajia talidang lirbo Ao oshi nüngja asütsüla ta ashibaji shitak lir. Saka ASLB-i tang ken atemabo aki amshia aruba nüngja yasa amshia atatsü ta shiogo. Saka tarutsü nung kodang melenshitsüsa kümdir Reverendbai ashiba amaji Ao Senden kaket keno Luden ta amshi nung ajungtsü ta bilemer.