Putepdaktsütsü inyakba mapa

Tsüngremi alima nung alitsü nisung yanglu aser longsu-longsua jangratema alitsü asoshi soyapokdaktsü. Ajisüaka, item nisungtem jagi Tsüngremi ashiba manga temenen menaba ajanga Tsüngrem o nisungtem na tsüngda meputep aküm. Aji oda, nisungtem temenen agi Tsüngrem nungi piladaktsü aser parnoki parnok yanglusang amadok nungji Tsüngrem kanga jashi liasü. Iba ama tia ka nung alijak nungi ano meimchirtem samatsü lia, Laishibai ashir, “Tsüngremi alima kanga meim nung, Pai pa ajaso chir ka dang aliba meimchir temenen pongitsü asoshi angati agütsü, anungji shirnoki Pa dak amangdir kodanga mesamatsü saka teti taküm angutsü.” Tetezü, Tsüngrem o meimchirtem na tsüngda meputepteti aliba Yisu Khrista alimai aruba ajanga putepshidaktsü. Alima nung meimchir taküm yimya, achiajem aser sobaliba ajunga tesempatsüka liasü. Aji oda, meimchirtemi Tsüngremi aginütsüsa kecha meinyak, ajisüaka Yisu Khrista nisung kümer alimai aru aser timtema kangki nung Pa taküm bendanga agütsüba ajanga meimchirtem temenen taidok angu. Tetezü meputepi aliba putepdaktsütsü asoshi inyakba maparen nung nisung kar mapang, rongsen aser taküm bendanga agütsütsü nüngdaker. Meputepi aliba puteptsüba jenjangji tasak. Odangbo meputeptettsü. Puteptsü atema kari aremzüktsüla, takoksa, timtem aser maksü aremtsüla. Aji oda, meputepi aliba puteptsü atema taidok agütsüteptsü nüngdak adoker. Item timtem khuret ajakji Yisu Khristai aben nungji asenokbo Tsüngrem den ano tesendaktep tajungba yanglutsüogo. Yisu Khrista tenüng maneni sangdi. Joko, asenok dang Yisu Khristai inyaktsü ashiba tongtibang mapa kaji, ” ni kechi koma nenok meim, yamaji nenok rongnunga kati ka den meimtepang,” ta ashiba o ya asütsü. Aji oda, asenok ya Yisu Khristai tenyaba mapa inyakertem lir. Asenok ya Tsüngremer osangbenertem aser yimjung yanglurtem asütsüla. Asenok tai temenen ajanga Tsüngrem den dang masü saka tangar dena meputeptetter. Iba jagi tanü asen lima ya meputep mesüra tsükchitep agi sünga lir. Asenok temenen ajanga kibong balalular, medemer aser kinüngertem rongnung meputep adoker aser arogo dena raksar. Temeneni asenok rongnung tenük merem aser mulung melemtep adokdaktsür. Item meputeptetba temenen ajak madak takok angutsübaji asenoki tama Tsüngrem den yimjung yanglu nung dang aser Pa den putepa ali nung dang akoktsü. Asenok mulung nungbo tangar sempar saka tebang agibo puteptsü jembir aser asenoki tangar nem taidok magütsütetter saka asenoki yimjung indang jembia senzür ta süra, ibajibo anemsü agi yimjung bushiba mapa ka asütsü. Iba jagi Tsüngrem mepeladaktsütsü aser nisungtem putepdaktsütsü makoktsü. Lashiba ajanga Tsüngremi asenok nem kanga inyakdaktsünübaji tangar dang temeim sayutsüba ya lir. Tetezü, asenok tangar den putepa alitsü aser tangar o tangar na ta putepa alitsü merangdaktsütsü. Yohan 13:35 nung ashir,  na Yisu dak amanger aser pa nütsünga ta tangari metettsübaji nai tangar dang temeim mapa inyakba ajanga metettsü. Tsüngremi koda meim yamaji asenokia tangar dang meimtsübaji dang Yisuia aginer. Temeim agi dang tai adoker aser temeim agidang putepdaktsür. Tangbo joko Tsüngremi asenok nem tangar asoshi putepdaktsüba mapa inyaktsü nunglokja lir. (2 Kor.5:18). Anungji, asenokbo meputep adokdaktsür masü putepdaktsürtem asütsüla.