Putepdaktsütsü tenyaba mapa

Kodang temenen nisung kati Yisu Khrista-ji pei taküm nung kibur aser kümtetdakba ta agizüker, Laishibai ashir, paji tasen poktetba (2 Kor 5:17). Ibai tesüngmangtsü osang tajung ka lir. Yisu Khrista den alitsü tenzükba nisungji nisung tamajung agi tajung küma yanglushiba nisung ka masü mesüra tejen agi tasen amato küma yangluba taküm-a masü, saka kenyongi pa mesüra laji tasen poktetba taküm. Tasen poktetba tetezü, idangji dang asoba nisung, anungji kasa Laishiba tapu aser tekong nungjisa ashir, tejenba taküm süiogo aser tasenba aruogo. Asenok temenen agi asenoksasa Tsüngrem nungi pilar aliba mapang, Yisu Khrista ajanga ano asenok Tsüngremer chir akümtsüsa taküm tasen küma soshiba osang tajungji ibai lir. Aji oda, kodang asenok taküm tasen küma soshir Yisu Khrista dak alir, asenokji pa nütsüng akümer. Pa nütsüng akümba tetezü asenokji Pai ashi angartem aser Pai tenyaba inyakertem lir. Anungji, 2 Korint 5 : 18 nung ashir, “Tsüngrem shibai Yisu Khrista ajanga  asenok Pa den putepdaktsü, item ajakji Tsüngrem nungi lir aser Pai putepdaktsüba mapa inyaktsü onok nem agütsü.” Tetezü, asenok tasen küma poktetdaktsüba Tsüngremer nükjidongji ano shirnoksa Tsüngrem den meputepteti ali, parnoka Tsüngrem tsüngdangi anir arua  putepdaktsütsübaji asenok mapa lir. Tsüngremi asenok ajak kanga meimer aser asenokia Tsüngrem den linür saka temeneni asenok Tsüngrem nungi piladaktsür. Aji oda, kodang asenok Tsüngrem den putepa melitetter, idangji tangar dena asenok meputeper. Aji oda, Tsüngrem den putepa melitetba kinüngtsü aser kinüngboi pei apuani den putepa melitetter, Tsüngrem den putepa melitetba tanurtemia pei tsürabur, tesayur aser medemertem den putepa meliteter. Ajaki ajak putepa linür saka melitetter, kechiyong nisung shia mulungjang nung temeneni mapa inyaker aser meputep adokdaktsür. Tsüngrem den putepa melitetba agi, tanü kibong aser taküm dang masü saka arogo dena raksadagi. Aji oda, temeneni nisungtem mulungjang nung tesempatep, tenükmerem aser temulung melemtettsüsa ochimashi mapatem adokdaktsür. Item ajakji Yisu Khrista taochi ajanga koda asenok Tsüngrem chir asütsüsa tasen poktetdaktsü, iba kasa taochi jagi dang kümzüktettsü. Atangji, Tsüngrem den meputeptetba nisung ka Tsüngrem tsüngdangi anir arutsüba mapaji tasak saka asenok nem nungloktsüba mapaji ibaji lir ta Laishibai kuli agütsür. Aji oda, alima nung Tsüngrem temeim memetetba nisung aika lir aser ano metetyonga atsüngzüka orr Tsüngremi nungi pilar aliba purtema aika lir. Item purtemji bushia oagi Tsüngrem den putepdaktsütsübaji asenok mapa lir. Tanü lima nung nisung o nisung na aser kin o kin na meputeper. Alima nung mapang tatsüka alidang jangratema ajak den putepputepa aser pelatepa alitsüba ser nung tsükchitepa dang lir. Iba jagi rara adoker, meputeper aser mepelar. Item purtem dangji tamasa Tsüngrem den puteptsü aser aji ser külen ano parnok o parnok na putepa alitsü ashitsübaji Tsüngremi tenyaba purtem mapa lir. Ajisüaka, asenok ama Yisu Khrista dak amangertemi anir kati ka den meputeptetra aser kati ka dang tai medoktetra, asenok amangba, asenoki sayutsüngiba aser asenoki sarasademba ajakji anemsü mapatem asütsü. Yisu Khrista dak amanger shia asoshi, Pa nütsünga ta tangari metettsüba temaitsü kaji, kati ka den meimteptsüla (Yohan 13:35). Tetezü, Yisu Khrista sülen anidakertem aser Pai tenyaba mapa inyaka jajartem temaitsüji tangar den putepa litetbaji asütsü. Aji oda, tangar meputepi aliba purtem putepdaktsütsü asoshi inyakertem atema o nung aser mapa agi Tsüngrem aser nisung den teti putepa alitsübaji kanga tenüngdaktsü. Nai na anasa alirtem den putepa litetra, iba kija jagi Tsüngremi na ajanga tangar putepdaktsütsü asoshi tenyaba mapa tuluka inyakdagi ta nai metettsüla. Yisu Khrista kangki nung timtema asüba ajanga asenok Tsüngrem den putepdaktsü süra aser kasa putepdaktsüba mapaji asenok nem inyaktsü nungloktsü süra, asenok tsükchitepa alitsüba mapangbo kenyongi malia ta asenoki angatetdi.