Putepshitsü atema sorkar tasen tentetshir : T.R Zeliang

Dimapur, February 22 (TYO) : Taoba chief minister aser DAN chairman T.R Zeliang-i ashiba agi, sorkar tasen tentetba sülen NPF nung putepshiba mapang ka arutsü imlar aser ibaji ajanga tiptema sorkar ketdangsübaren inyaktsü.
Taoba par cabinet nungi minister asem tashi tang sorkar tasenba nung medensemba atema osangbenertem asüngdangdang, “nisung kar pelatsü aser karbo tezü atangtsü saka nisung ajaki iba sorkar nung shilem agitsü” ta T.R Zeliang-i langzü.
Taoba hopta pa ajungbena Delhi-i aoba atema jangjashitsüdang, “Sorkar sasep nung mepetmesü kecha mali, anungji President’s Rule alitsü nüngdak madoker ta ashitsü atema ni Delhi-i ao” ta paisa shisem.
Centre nung lennirtemi chief minister tangar ka nem inyakdakjang ta tebilemba lemsatep aser iba jagi pa meyipa aru aser menden toktsü. Nagaland nung tensa süngjema aoba angudang kanga pelar, ta taoba chief minister-isa metetdaktsü.
Centre sorkari taoba chief minister aser MP Lok Sabha Rio nem chief minister inyakdaktsütsü atema ashiba atema T.R Zeliang-i ashiba agi, ibaji MLA tem aser tensa dak dang keta liasü.
Shiba tetuyuba ajanga MLA tem Kaziranga-i alu ta osangbenertemi asüngdangdang, “iba atema onük balaka mali saka parnok lennir shimtsü atema MLA tem Kaziranga-i alu” ta paisa langzü.
Centre nung BJP lennirtemi NPF sasep nung mepetmesü teti alir aser iba jagi Rio nem chief minister menden agütsütsü aser pa den putepshir külemi inyaka aotsü kü dang ashi. Ajisüaka, Centre sorkar nungi tetuyuba mesüra teinyaktsü lemzüktsüba sülen ni manidaker, ta T.R Zeliang-isa ashi.
Nagaland nung BJP 4 dang lir aser NPF tashimait kümra, BJP tamendakdaka tashimeiti akümtsü, anungji NPF sasep nung temulung masüba malitsüla, ta taoba chief minister-isa shisem.