Putin-i Greece tan hopta semdangtsü

Moscow, May 23 (Agencies): Russia Tir, Vladimir Putin-i Greece tan hopta semdangtsü sentong renemba osang ka Kremlin-i tanü, Hombar nü metetdaktsüogo.
“Ozü lenisang, Putin-i tan May ita 27-28 nü Greece semdangdang Greece Ato Kilonser, Alexis Tsipras aser Tir, Prokopis Pavlopoulos na den ajurutepa ozü linük ana tsüngda rongsenren aser energy den sentakba tesendaktep tajungba küma yanglushitsü onük benoktsü,” ta Kremlin-i osang jangjashitsü.
Putin-i yaküm, 2015 küm June ita Italy semdanga, par Ato Kilonser, Matteo Renzi aser alima ajunga nung Roman Catholic tamangba yimsü benshir lenisang, Pope Francis na den ajurutepba sülenbo tan mezüngsüa European Union (EU) nung züngsemba linük ka semdangtsü sentong renemer lir.
Putin-i tan Greece semdangdang, pai Orthodox Christain-temi temeshitiba tesem ta züngshidak, Greece anodoklentip tsütsü, Mount Athos semdanga, idakji agitsü renemba Russia nüburtemi Orthodox Christianity tamangba yimsü nung shilem agir küm 1000 abensaba benjungmong nung shilem agitsü sentong renema lir.