Putin-i ICC toktsütsü onük agizüker

Moscow, November 16 (Agencies): Russia Tir, Vladimir Putin-i pa maitsü ajenokja, par Russia linüki International Criminal Court (ICC) toktsütsü asoshi benokba onük tanü, Bodbar nü agizükogo.
Alima ajunga nung nisung khen nung jenti tesepba aser iba amala meimchir anema ozüng alema maparen inyakba ken o angadanga, tapet obendang agütsütsü asoshi alima jenjang nung tentetba ICC nung par Russia züngsemtsü asoshi par linüki 2000 küm Rome tezüngzüktep agi saka par linüki ICC nung züngsemtsü tenangzükba tatem küma magi aru.
Russia-i tashiyim agi Ukraine ket nungi Crimea peninsula agiba maparen aitsüba olen ka United Nations General Assembly (UNGA)-i sangoktsür anogo tanabuba nung Putin-i par Russia linük ICC nung madentsü onükji agizüker lir.
Russia-i Ukraine ket nungi Crimea peninsula 2014 küm March ita tashiyim agi agiba sülen, Crimea tashiyim agi agiba den Ukraine nung tensa mejungi kümdaktsütsüsa Ukraine sorkar anemer pusema nungitba ken o nung ajemdaker US densema, alima tashi abenba linüktemi Russia anema tenokdangtsü sentong kanga sashia benoka lir.
“Russia linüki ICC nung teti atema züngsemtsü tenangzükba tatem küma magi,” ta shia, par Russia linük jenjang tajungba kümdaktsütsü nükjidong nung par linüki ICC toktsütsü lemtetba osang ka Putin’er otongdar, Dmitry Peskov-ia metetdaktsüogo.
Ano, “Crimea nüburtem rong nung vote bendentsü mapatong agiba sülen Crimea-i pei mulungka nung Russia den lokteptsü lemtet,” ta shia, par Russia linüki Crimea tashiyim agi magi ta pai par Russia metentsüba olen ka sangoktsü.
ICC nung züngsemba linüktemi ICC metoktsütsü tayongzükba olen ka UN human rights lenisangi sangoktsür ghonda ishika tsüngda nung Russia-i ICC toktsütsü lemtetba osangji sangokja liasü.