Putin-i nangzükba raksa, Syria nung Russia sepia majemer

January 12 (Agencies) : Russia Tir Vladimir Putin-i tawa Syria nung Russia sepai ajema kümdaktsütsü ta nangzüka liasü saka pai nangzükba ama meinyaker, ta US ketdangser anati Fox News dang ashi.
Tenati ashiba agi, Russia-i tan hopta tetenzüklen parnok indang raradang amshiba tayimtsü pezü yoksemogo. Item tayimtsütem ya Syria matong tsüngda totzü inoktsü atema Iran nung anena liasü, ta tena rongnung kati ashi.
“Parnoki (Russia-i) Syria toktsütsü jembir, ajisüaka parnoki nangzüba ama inyaka magur. Jembiba dang nungi balaka inyakba ang angur,” ta tenati ashi.
NATO-i Frogfoots ta ajaba Russia meyong Su-25 jet temji Hombarnü Syria tonga aru. U.S. Air Force’s A-10 den saku tayimtsü, Su-25 ya ali anasa raraba mapang amshir. Tayimtsü anirtem ali nungi injang agi akhadang kümzüktsü atema tan aruba tayimtsütem tezülen injang nungi kümzüktsü inoka lir.
Russia-i Chechnya, Russia nungi contractor tem aser raratema yoka lir, ta tena rongnung kati ashi saka kwi yoka lir ibajibo mashi.
Russia-i Syria nung raradang amshiba jet aser injang akhaba helicopter 36 shi yoka lir aser iba ya taoba ita nungi tajemba makümer, ta ketdangsertemisa ashi.
Putin-i Iran aser Turkey den cease-fire akatsü telemtetba agiba sülen December tatemlen Syria nungi par sepia ajema akümtsü tetuyuba agüja liasü. Iba telemtetba agidang US bo maden.
Hokolbarnü Russian military officer kati, Russia indang tayimtsü abenba Admiral Kuznetsov rong ang meyipa anir aotsü, ta ashi.
Pai yamaji shiaka Admiral Kuznetsov rongji tang tashi Libya tzükümlen Mediterranean tesem nung maneni training agidar, ta US ketdangsertemi ashi.
Ita ana dak tema Kuznetsov ajanga Syria nung anüng nungi aiben makaogo.
Ita ana tsüngda nungji Kuznetsov nungi Russia tayimtsü 154 tashi yimketdakja liasü.
“Onok indang tayimtsü abenba rongtem nungi iba mesükba mapaji anogo ishika tsüngda inyaker,” ta US ketdangsertem kasa osangbenerttem dang ashi.
Russia-i September 2015 nungi tenzüka Syria nung anüng nungi amakba mapa tenzüka liasü.