Putin-i nuclear oset amshia IS anema raratsü onük benoker

Moscow, December 10 (Agencies): Russia-i par missile bomb nung tongpang nung amshitsü nuclear oset mesenloker tang Syria aser Iraq na nung tesep tenteta lendong kanga sashia atalokdaktsüba kiralongrar telok tetsüti, Islamic State (IS) anema raratsü onük ka Russia Tir, Vladimir Putin-i benokogo.

Russia Defence Minister, Sergei Shoigu den ajurutepa senden ka amendang Putin-i iba onükji benokba osang jangjaogo ta Russia sorkari ketdang asüba RT osangi metetdaktsü.

“Asen mitkartemi takok tulu ngua missile bomb-tem amshia tongpang raraba osang angazükogo. Missile bomb nung nuclear oset mesenlokba ajanga IS anema raraba tongpang nung takok tali angutsü imlar,” ta Putin-i lemsatep.

“Missile bomb-tem nung nuclear oset mesenlokba ajanga asen Russia mitkar aser tzüyim sepaitem tashi tali itshitsütsü,” ta paisa shisem.

Russia’er tzüyim mitkartemi tan mezüngsüa par tzüyim telung nung senzüba submarine rong nungi missile kalokja Syria kübok Raqqa nung tesep tentetba IS telok amakba sülen Putin-i iba olenji benokba osang jangjaogo.

Russia-i Syria tzüyimkümlen, Latakia province nung mitkar tesep ka tentetba sülen taküm 2016 küm September ita 30 nü nungi tenzüka par tayimtsütem yoka Syria nung tesep tentetba IS telok anema raraba osanga bushiteta lir.

Ajisüaka, Russia-i IS telok anema raratsü dak atemer Syria Tir, Bashar al-Assad-i aniba Syria sorkar anemer teloktem anema tongpang rarar ta shia, US densema, West-i Russia aija lir.