Putir amokmerenba onük India-i B’desh den jembidar

New Delhi, June 17 (Agencies): Bangladesh yimtiba, Dhaka nung aliba Ramakrishna Mission nung putir ka tepsettsü amokmerenba sülen India-i iba atemaji Bangladesh ketdangsertem den tongtepratepa inyakdar.
Amokmerenertemji ISIS züngsemtem südi ta mulung malemer. Iba amokmeren sülen Ramakhrishna Mission complex nung security akhangshiogo.
Tawa Bangladesh nung mulung malemba telungpurtemi nisung tepsetba tatalokba aika alidang Bodhbarnü amokmerenba shidiji Ramakrishna Mission ket tonga liasü. Iba shidi nungji, putir jagi pa tamangba yimsü (Hindu) maneni sayutsüngira pa tepsettsü, ta amokmerena lir.
Tanü External Affairs Ministry otongdar, Vikas Swarup-i, iba onük ya  Indian High Commission-i Bangladesh Foreign Ministry aser police den tongtepa jembidar, ta metetdaktsü.
“Dhaka nung High Commission of India-i Bangladesh Police aser MOFA (Ministry of Foreign Affairs) naprong den jembiogo, aser parnoki akokba tashi nungittsü aser kümzüktsü ta shiogo,” ta Swarup-i ashi.
Swarup-isa, security reprangshitsü atema tanep High Commission nung First Secretary (Consular)-i RK Mission semdangogo, ta ashi.
Dhaka Ramakrishna Mission ya Kolkata nung aliba Belur Math indang kongsang ka lir.
Amokmerenba shidi nung, “Bangladesh ya Islamic state ka lir. Yangi nai nü tamangba yimsü indang sayutsüngitsü makok. Nai maneni sayutsüngira 20 aser 30 nü (June) tsüngda na nok agi lepsettsü,” ta shia lir.
Tawa Bangladesh nung Hindu monastery ka nung inyaker, Nityaranjan Pandey tepseta liasü.