Putu tasen den sobaliba renemshiba

– Evan A. Shilu Ozk, Aoyimküm.

Menden, tsüraburtem, medemsor aser sentepa aliba adianutem, tanü iba senden nung onük “Putu tasen den sobaliba” jembitsü nungloktsü nung onükji tatsü agi ratettsü nokdaker. Mezüngbuba nung tanü kwika iba senden nung densemogo Tsüngremi asenok kanga moatsüogo, kechiaser iba Putu tasen, Aso tasen aser küm tasen nung asenok sentepa lir, ano kwikati iba Putu tasen yongya liasü saka parnok tanü taküm mali parnok asoshi asenoki sasatsür.
Putu tasen ta ajaba indang bushira asen tsürabur mapang nungi sobaliba-a arudang Chungliyimti nungi tanü tashi yimden ka lateter putu balala tentet-a yimden tentet-a aru. Kodang putu otsü jembir Aor sobaliba nung yimden telemtet putu 5 lir itemji 1) Medemsanger Putu 2) Mejensanger Putu 3)Mupongsanger 4) Kosasanger aser 5) Reongsanger Putu ta lir. Putu shia tasazük küm 30 tashi latet-a yimsü asür, putu kar nung küm semer dak tali-a yimsü aser aser putu kar nungbo küm semerji matongdang putuji melentep-a aru. Putu shia konang aser timtem balala atalokba aser takzüdakpungba indang jembir. Ano yimtsüng kar nungbo iba putu tentet ya küm 6 tashi nung tang-a atsüngba sobaliba lir. Tanü asenok Reongsanger Putu nung alir, yamaji putuji melentepa arur, saka tanü onük jagi asenok Ao kin putu tasen indang masü saka alima ajunga putu tasen kati aiba indang ratettsü asoshi nungloktsü nung putu tasen indang alima ajunga sobaliba aser tentet-a aruba indang zülur. English oshi nung iba putu balala dang Century ta ajar aser putu ka nung küm noklang ka lir, Iba küm ya ajemtsü aser tali bendenloktsü makok. 2001 küm ya 21st century ta ajar. Ano iba putu tasen den Aso tasen koba dang New Millennium ta ajar. Yisu Khrista alima-i arur küm meyirjang ana abensaba den Aso tasen kati aiba indang Laishirtemi küm meyirjang ana shinba lai nung angutsü Jungkai adok (Revelation) tapu 20 tapak 4 nungi tatem tashi züngra Yohan pungmang ajanga iba Aso tasen indang züluba angutsü aser iba Aso tasen indang tongtipangsa Europe lima 17th – 18th Century nung Arogotem aika nung shin-a liasü.
Tsüngremi meimchir yanglur soyapokya-a aodang küm (year) ita (month) hapta (week) anogo aser mapang azüngba marudang meimchirtemi tsüngsang-mopung aruba aser alima yimya mopung melenteba nung ajemdaker mapang aser anogotemji züng-a liasü. Ita (moon) tasen anüng nung adokba nung ajemdaker Alu ayimba, metsü yokba, süngo-lio aser chiyongtsü balala züsentetba aser tamangba balala külemkeja latet-a aru. Anungji mapang aser anogotem, latettsü asoshi jaka aser nisung telok balala nungi maneni bushiba angur, küm meyirjang aika tejaklen Egyptian nungertemi Nile ayong koba Egypt ajanga ayimer iba ayong nung tzümetsüng adokba indang mapangji asadanga liasü aser otsü ajanga ashiba agi ita (moon) teranaben atokba shia iba tzümetsüng atoker aser iba ita terana abensaba anogo aser mapang nung parnoki küm (year) ka ama züngshia liasü. Ano ita adokba den pitenu kar anogo 365 abensaba shia anüng nung atoker ta Egyptian nungertemi takzü-a liasü. Anungji iba takzüba dak ajemdaker parnoki küm ka nung anogo 365 lir ta amang. Parnoki ano anogo 365-ji ita 12 ana nüm lemsatsü aser ita (month) ka nung anogo 30 tashi lir ta parnoki-sa amang. Rome yimli mapang nung-a kasa küm (year), ita (month) aser anogo tentet koba Egypt lima benshia aru aji agizük aser meyilongi Europe aser Rome yimli nung amshi.
Küm aser Ita züngdangba tentetba den külemi hapta (week) ango meyilongi tentet-a aru. Meimchir nütsüng yongsük ainba den külemi yimtitem soyapokya-a aodang shishilembaba lenmang balala lapok. Shishilembatsü asoshi parnoki anogo ka jaka, mapang apir monga liasü. Iba kasa mapang nung Babylonian nungertemi anogo tenet-nübuba nung shishilembaba aser Tsüngrem külemba anogo (Sabbath) teroknübuba nung monga liasü. Meyilongi anogo tenet shia tenüng palala agütsü aser item tenüngji parnok tsüngremtem tenüng agüja liasü. Tatishitsü Sun Anü Tsüngrem Sunday, Moon Ita Tsüngrem, Monday yamaji anogo tenet tenüng agütsü.
Putu tasen ajurutsü aser amongtsü asoshi alima kin ajak nung 1999 küm nungi tenzüka yimtitem aika nung sentong yanglua monga aruogo. Nagaland nung sorkar aser lokti balalai iba putu tasen asoshi sentong yanglua mongogo. September ita 7th-9th 2000 nung New York (USA) yimti nung alima kin 160 tashi sentepa putu tasen asoshi nükla tasen indang lenmang bushia telemtetba jenti liasü. Item tongtipang telatetbaji alima ajunga nung azü tokshiba anentsü, raraba oset (weapons) yangluba anentsü, rongsen lenmang bushiba nung lenmang sadema lapoktsütsü, nütsüng tali akümba nokdangtsü, (population problem) AIDS tashidak koba agi nisung meyirjang aika shiranga lir item ya tali mezüintsü asoshi lenmang bushitsü, mopung, shiruru aser süngdong-lidongtem wazüka ayutsü indang jembia liasü.
Iba putu tasen nungsa alima ajunga nung shishilembaba nung temelenshi tulu adoktsü (Free market) rongsen ajanga dang kin ka nüjiso angutsü. Taruba küm 50 tejaklen sorkar ajanga dang rongsen lenmang renloktsü ta Russia aser pa anasa aliba kintemi merang. India nunga kasa nükla nung yur 1970 nungi 1990 tashi sorkar ajanga rongsen lemang aser shishilemba ajak inyaktsü tenzük, saka küm 20 tsüngda nung item Industry ajunga tamakok angu. Ano Russia aser Eastern Europe nunga kasa tamakok anguba ajanga 1990 nungi yimden aser rongsen bushiba nung temelenshi adok. Tongtipangsa Information technology renlokba den Computer aser internet ajanga sobaliba ajunga nung temelenshi jenti adoktsü. Ano Medical Science renlokba ajanga meimchirtemi nisung laboratory nung yanglutsü (cloning) tashitak aneptsü asoshi Genetic Engineering ajanga tashidak aketba Cell (DNA) melentsü iba ajanga mozü yangluba aser shiranger aneptsü asoshi iba putu tasen nung temelenshi jenti adoktsü. Kaket shisatsü (Education) bushiba nung temelenshi jenti adoktsü aser Education angutsü asoshi rongsen jenti nüngdaktsü.
Schools, Secular Colleges, aser Theological Colleges aika küm 10 tsüngda tongtipangsa Dimapur nung lapokogo. Item School aser College ajanga loktiliba aser kibongtem nung khuret arutsü, kechiaser Quality of Education mongura University Degree kisungi shitakba Education mongutettsü. Obendangba (Court) aser anema alitsü (Health Care) atema rongsen mekara aji mangutsü. Tanü America, Europe aser Developed Country nung obendangba aser Health Care nung rongsen teimba indoker ta ashir. Anungji putu tasen aruba den rongsen lenmang aser sobaliba ajak nung temelenshi adokba, iba putu tasen nung kija aser kibong renema melira putu tasen aruba kijai asenok nem temoatsü Israel nunger nem mana agütsüba ama magutsütsü.

You must be logged in to post a comment Login