PV Sindhu-i Malaysia Masters Badminton nung takok angu

Bernama, January 24 (Agencies): World Championship nung anaben bronze medal bena alila, India tsür P V Sindhu-i küm tasen nung Malaysia Masters Grand Prix Gold medal ngua taküm asoshi takok ma nung tenzükogo. Lai Deobarnü final asaya nung Scotland tsür Kristy Gilmour madak mela mela takok angu.
2013 French Open nung P V Sindhu-i Kristy Gilmour makok ajisüaka tanü la dak aliba sempet tajungtiba agi asaya aser lai 21-15, 21-9 ngua iba takok angu. Tena tsüngda iba asaya ya minute 32 nung atem.
Tan akokba dena P V Sindhu-i Grand Prix Gold pongu buba angur asütsü.
Lai 2013 küm Malaysia Masters Grand Prix nung Gold anguba sülen tan angurba lir.
Ano Novenber ita nunga lai Macau Open Grand Prix Gold medal angu aser ibaji la asoshi iba open nung takok asembenbuba angurba liasü.
Badminton Association of India (BAI)-i Sindhu Malaysia nung Deobarnü takok anguba tenüngsanga liasü aser la nem sen lakh 5 senpet agütsü metetdaktsüogo.
“Iba takok tulu asoshi ni la tenüng asanger. 2013 küma lai Malaysia Masters Grand Prix nung takok ngua liasü. La ajanga tenüng tajung bentsür aruogo aser tarutsü nunga takok angutsü kü teimla,” ta BAI Tir Akhilesh Das Gupta-i sangdong ka ajanga ashi.
George Tow, Penang nung aliba Spice Arena nung tebur kija asaya nung Datuk Lee Chong Wei aser Iskandar Zulkarnain na asaya.  Chong Wei-i 21-18, 21-11 agi koka Gold medal angu.
Chong Wei-i 2009, 2010, 2011 aser 2012 kümtem nunga Malaysia Masters Grand bena lir.
Tebur nisung anana sür asayaba nung Malaysia nungi Koo Kien Keat/Tan Boon Heong nati 18-21, 21-13, 21-18 agi Indonesia nunger Gideon Markus Fernaldi/Kevin Sanjaya Sukamuljo na madak takok angu.
Ano tetsür anana sür asayaba nung Japang nungi Misaki Matsutomo/Ayaka Takahashi nati China tsür Tang Yuanting/Yu Yang na madak 21-18, 22-20 agi takok nguogo.
Tebur aser tetsür kija asayaba nung takok angur nem senpent sen dollar 9,000 agütsü aser tanabuba jenjang nung takok angur nem sen dollar 4,560 agütsü.
Nisung anana sür asayaba takok angur nem sen dollar  9,480 agütsü aser tanabuba jenjang angur nem sen dollar 4,560 agütsü.