PWC-i Naga yimten latettsü mepishir

Dimapur, Luchii (December) 19 (TYO): Nagaland Joint Legislator’s Forum on Naga political issue atema Parliamentary Working Committee (PWC)-i India sorkar dang tekaratiba nung yimten latettsü atema Indo-Naga olemtep yakta agiyonga otsü mepishia metetdaktsü.
Bodbar nikongtsütsü PWC chairman Zaleo Rio lenisüba kübok senden ka amendang iba telemtetba agi. Senden nung Nagaland chief minister Neiphiu Rio den political party balala nungi züngsemtem aden, ta Nagaland Legislative Assembly, Commissioner & Secretary N. Benjamin Newmai-i sangdong ka nung metetdaktsü.
India sorkari temulung agüja telok ajak den asüngdangyaba aser olemtep aliba atema pelar. Maneni Naga National Political Groups (NNPGs)-i olemtep nung adenba pelashishia agizüker. Tanüngba Naga national political groups-ia yimjung olemtep nung adentsü atema mepishir, ta PWC-isa metetdaktsü.
Naga nüjiso atema inyakertem aser parnok kibongtemi Naga temeten atema rara nung noktakba atema Committee-i pelar. Talisa, civil society temi tebilemba tajung nung yaritepba ajanga tanü Naga yimten tebilemtsü jenjang tajungba ka nung lir aser iba atema parnok danga pelar, ta PWC-isa ashi.
December 12, 2018 nü New Delhi nung asür Gen (Rtd) Kholi Konyak asüba atema mang ayimer. Pai Naga nunger atema mapa tajung inyaktsüba kodanga mamatsü, ta PWC-isa metetdaktsü.