PWC-i NSCN-IM tanishir Th Muivah aser tangar den ajurutep

PWC-NSCN-IMDimapur, February 17 (TYO) : Naga Yimten tebilemtsü atema tentetba Parliamentary Working Committee-i Bodbarnü New Delhi nung NSCN-IM tanishir Th Muivah aser tongti ketdangser kar den ajurutepa NSCN-IM aser India sorkar tsüngda yimjung mapa inyakba dak sendakba onük kar benoka olemtepogo, ta tanü Media Cell, Chief Minister’s Office, Nagaland sangdong ka nung metetdaktsü.
Nagaland Legislative Assembly Speaker Chotisuh Sazo aser Nagaland Chief Minister TR Zeliang nati aniba züngsem 19-i akümba CWC-i Bodbarnü NSCN-IM lennirtem den India sorkar aser NSCN-IM tsüngda Naga yimten tebilemtsü atema olemtep agiyonga aruba osang metetpela aser iba maparen tekaratiba nung tembangtsü atema PWC-ia yariteptsü tebilemba lemsatep.
Iba senden nung NSCN-IM tanishir Muivah-i Naga nunger den meputepba onük kar aliba aser ano yimjung olemtep agia aruba nung pai achitetba olen kar lemsatepa liasü, ta Media Cell, CMO sangdong nungsa shia lir.
Tanü nikongtsütsü Nagaland House nung PWC-i Shiv Sena nungi Leader of Parliamentary Party, Lok Sabha Anand Rao Absul dena ajurutep.
Iba senden nung Anand Rao-i India sorkar aser NSCN-IM tsüngda nisung ajaki agizüktettsüsa telemtetba ka agira par party-ia pusema nungitttsü ta metetdaktsü. Shiv Sena ya NDA den yaritepba telok ka lir aser Rajya Sabha nung parnok züngsem 3 lir, at Media Cell, CMO sangdong nungsa metetdaktsü.
Lok Sabha nung BJP züngsem timba lir saka Rajya Sabha nungbo NDA züngsem peria mali aser iba jagi parnoki tanga party tem madak ketdang mesüteter. Rajya Sabha nung INC nungi züngsem 67, Trinamool, AIADMK aser JDU nungi züngsem teranana, Samata Party nungi 15, BSP nungi 10, aser CPI(M) nungi 9 lir. Naga yimten tebilemtsü atema telemtetbaji Parliament nung House anapronglai agizük nungdang mapa akümtsü aser iba jagi linük nung national aser regional party balala nungi teyari nüngdaker, ta sangdong nungsa shia lir.
Naga yimjung olemtep ya UPA sorkar mapang tenzükba lir aser tang Prime Minister Narendra Modi-i aniba sorkari jenjang tajungba yanglushi, anungji yimtenren telok balalai iba maparen pusema nungittsü ta teimla lir, ta Media Cell, CMO-isa metetdaktsü.
PWC-i yashi BJP tir, Amit Shah aser JDU tanishir Sharad Yadav na den ajurutepogo aser maneni taruba anogotem nung national lennir aika den ajuruteptsü sentong lir.

You must be logged in to post a comment Login