PWD aser Contractor temi sen miimzüka magitsüla: NMA

Kohima, October 10 (TYO): Nagaland nung lenmang anepalutsü atema senotsü aruba nung Public Works Department aser Contractor tem tesentaktep yur tajangzük agiba anentsüla, ta tanü Naga Mothers Association (NMA)-i metetdaktsü.
“Tetsütem aser tetsürtem ama, lenmang majungba ajanga onok temang aser taküm nung timtem jenti ajurur. Talisa lenmang majungba ajanga yimtsüng tia nung alirtem aika taküm samaogo” ta NMA tir Abei-u Meru-i ashi.
State sorkari ayongzükba Colloquium on Road Connectivity nung jembidang lai iba onük jembi.
“NMA-i state kinük ajaklen yimjung mapa atema inyakdang semdangogo aser tesem aika nung lenmang tajung maliba nguogo. Talisa yimtsüng kar nungbo ita aika lenmang majungba ajanga tangar den tesentaktep maliba tia ajuruogo,” ta Abei-isa ashi.
Shitakba agibo aputem ajanga nisungtem sendakteper saka tesem aika nung nübortem atema apu yanglua mali aser kar nung aputem chirepogo. Iba tebilemtsü ya Roads and Bridges anepalutsü atema tentetba department-i abentsüla. Engineer temi office nungdang mena mekazüi tesemtem tonga oa semdangtsüla aser contractor temia ochishia mapa inyaktsüla, ta laisa shisem.
“Public lenmangtem yangluba nung department aser contractor tsüngda tangatettep nung sen miimzüka agiba ya anentsüla. State nung lenmang tajung alitsü atema nisung ajaki ochishia mapa inyaktsüla” ta NMA tirisa metetdaktsü.
Tanü agiba sentong nung PWD National Highways, Roads and Bridges, National Highways and Infrastructure Development Corporation, Border Roads Organisation aser Nagaland State Disaster Management Authority temi lenmang balala yangluba indang power point presentations sayua liasü.