PWD-i Nagaland nung gari lenmangtem digitize asütsü: Swu

Kohima, June 21 (TYO): State renloktsü atema lenmang tajung aser tesentaktep nüngdaker aser iba atema Nagaland Public Works Department (Roads and Bridges)-i gari lenmang indang mapa digitise asür.
“Digitisation ajanga state nung aliba gari lenmangtem tia metettsü aser iba atema mapa tenzükogo” ta PWD (Roads and Bridges) Minister, Y Vikheho Swu-i ashi.
Kohima nung ‘application of new materials in infrastructure development’ indang shisatokden aser workshop ka nung o jembidang Swu-i iba osang metetdaktsü.
Roads and Bridges ya department tongtipang ka lir saka state nung gari lenmangtem indang tia kanga mejungi lir. Tanü-asüng amshiba technology tem mamshira, infrastructure development nung aser talisa gari lenmang wadang nung mapa takok ngua meinyaktettsü, ta paisa ashi.
Nagaland nung gari lenmangtemji tzüngluruwa ka dang süirbo raksar. Iba khuret angateta Department-i lenmang tajungba yanglutsü atema RoadCem (nano science for road construction) aser kilentzü atema Alcorr double wall corrugated pipes amshia yanglutsü, ta Swu-isa metetdaktsü.
Nagaland nung gari lenmang anepalutsü atema senotsü peria melemzüktsür aser Work Charged employees ta ser alirtem nübo timi amshira, gari lenmang anepaluba nung teyari angutsü, ta paisa shisem.
PWD R&B Minister, Swu-isa department nung engineer tem dang detailed project report (DPRs) yangludang kanga kümdangtsü atema ayongzük.
Mapang shitak nung gari lenmang anepalutsü atema PWD R&B ket nung osettsüset peria alitsüla aser iba atema taküm August ita tashi nung R&B divisions 24 nem excavator ka ka agütsütsü, ta paisa shisem.
Sentong nung PWD Engineer-in-Chief, Khupi Natso-ia o jembidang, Nagaland nung gari lenmang majungbaji contractor temi mapa shitak meinyakba ajanga dang masü saka ‘materials’ tajung mamshiba ajanga lir, ta metetdaktsü.
“Asen state nung gari lenmang shilem 70 shi ka nung lung shitak agüja mali aser materials majung” ta Natso-isa shisem.
Iba sentong nung Tenaci Engineering Pvt. Ltd, Alom Poly Extrusion Ltd aser Stabilig Road Solutions, Aegis International Group nung mongin nisungtemi Nagaland PWD kübok division ajak nungi engineer tem nem tesayuba agütsü.