PWD-i tai nangzüktsüla

Raksar aliba tasen küma yanglutsü asoshi mozü tajungtibaji aibeleneri tai nangzükba ya lir. Atangji, alima nung nisung ajak asoshi tangar dang tai nangzüktsüba yasa tasakba aser aikati aibelena liaka menangzüktetter. Ajisüaka, aibelena yur mimbangba agi tai dang teimba akümer aser ibaji kija taküm aser lokti asoshi tashidak tamajung akümer. Tanü iba ama tashidak jagi Nagaland kangshir.  Aji oda, yakanü Dimapur nung Chate ayong temdangba apu chirepbajia tanga kuli agi masü saka PWD (R&B)department-i junga mereprangba, junga anepalu masüba aser memenu dang mapa shitak meinyakba ajanga lir. Aji oda, apu chitrepbaji nisungtemi tashi mangai senzüba dak atongtsü makok, mesüra tzümetsüng tulu aluba dak atongtsüa makok aser apu tekulen lisem aser longsang ayartem dang atongtsü makok, iba lendong takoksa aser timten ajungaji PWD-i anepalu masüba ajanga lir. Apu repranga anepalutsübaji PWD (R&B) department khuret süra parnoki iba apu tejenba nungji gari mesenzüdaktsütsüla aser iba melena apu tasen ka yaktasa temtsütsüla. Iba apu reprangtsübaji PWD pur süra parnoki apu tongshi tashimait akümtsüsa apu tekulen shinga nema lisem aser longsang meyadaktsütsüla. Atangji, iba apu chirepbaji longsang aser lisem ayaba agi chirep alitsü, saka ibaji PWB purtemi junga mereprangba agi aser menokdangba agi alima aser lokti asoshi junga mebilemdangi inyaker kar arua lisem aser longsang  yaa bener ogo ta agidi. Joko, nisunga süogo aser nübortema aika timtemdagi, anungji PWD purtem asoshi tekaratiba nung Chate ayong ajanga gari senzütettsüsa lenmang yanglutsübaji asütsü. Ibaji tenzüktsü atema tamasa PWD (R&B) purtemi nübortem dang taidok meshitsüla aser tang nungi pei mapa nung temulung tagütsüba aser temerangba inyaktsüla. Iba apu ya dang masü saka Nagaland nung apu aika tachireper lir aser lenmang majungba agi anogo shia tesem tesem nung gari lendong atalokdagi. Aji oda, lemang majungba agi gari raksaba ajunga PWD purtem nem menokdaktsütsü bener arunungbo sen aika adoktsü. Atangji, tanga lima nung asübo nübortemi yamajia inyakla. Tanga lima nungbo gari lenmang nung break breaker tera meshitaki yangluba ajanga aji ajanga süidang gari raksaba asoshi dena temenok meshia government anema okadak ken o benoker. Item ajakji angateta, joko tanübo temetetba aser tangatetba putu nung alir asünungji, nübortemia pei temeten ta angateta inyaktsüla aser department-ia nübortem  ain adoka longkak ait  matatsüla. Tanübo apu chirep nungji PWD purtem indang jembir saka kasa khuret ya department ajaki abentsüla. Pei lima aser nübortem meima inyaknertem asoshibo government mapa inyakba ya anisüngzük makaba mapa süaka jangratemtsüka, kechiyong anogo shia nübortem anisüngzükdaktsütsü aser ajangzükdaktsütsü asoshi mapa ka mesüra kabosa inyaker anogo süidaktsütsübaji tepelatsüka lir. Iba tangatetba nung tanü Nagaland government mapa nung inyakertem rongnung mapa inyakba sobaliba nung asentenshi ka adoktsü nüngdaker. Iba asentenshi jagi government mapa inyaker ajungaji Tsüngrem tenzüker ama bilema nübortem tenzüktsüla, kechiyong nübortem tenzükbaji Tsüngrem tenzüker. Atangji, iba tangatetba nung asenok tsüraburtem aikati Nagaland tesem balala nung nübortem tenzükogo. Item temoatsü chirtemji asenok lir. Ajisüaka, asenok asoshi tekümdangtsü kaji asenoki asenoksasa temoatsü chirtem agi atakatem bener aruba tsüraburtemang küma litetra, asenok chirnur aser semchirsemnurtembo temoatsüba chirnur aser semchirsemnurtem asütsü melen atakatem abenba chirnurtemang akümtsü. Aji oda, tanü asenok jenjang tajung nung aliba ya tsüraburtemi ochishia nübortem tenzükba ajanga ta angateta asenokia rongsen nükshia masü saka ochishia nübortem dang meima tenzüktsü merangtsüla. Asenok atema senmangbo senotsü masü aser kiojena masü saka ochi aser tangar dang meimba shisatsü, mapa aser sobaliba lir ta angatetdi.