PWD Minister-i Japu yim lenmang lapoktsü

Dimapur, February 10 (Agencies): February 9, 2019 nü PWD minister, Tongpang Ozukum-i Japukong road adena Japu yimdaki aoba lenmang lapoktsü.
Iba sentong nung Minister Tongpang-i o jembidang Japu yimer aser 30 Alongtaki assembly constituency-i mangdang aketba lennir Temjen Imna Along Longkumer shimtetba atema tenüngsang agütsü.
“Higher & technical education minister Temjen Imna Along Longkumer ya par constituency tenzüktsüba dang masü saka Naga nunger aser India tenzüktsü atema lir” ta Tongpang-i ashi.
Imna Along-i pa iba sentong nung adentsü jaokba atema PWD Minister-isa pelaba ashi. “Lanur aser mezüng atema MLA ka dang süaka pai (Imna) nübortem asoshi mapa aika inyaktsür aser iba atema tenüngsang agütsür. Pa ama lennir ka aliba ajanga PDA sorkar jenjang tali ajungkettsü” ta paisa shisem.
Tongpang Ozukum-isa “committee nung convener aser Japu yimertemi iba mapatong asangsang nung atalokdaktsüsa yaritepba atema pelar” ta metetdaktsü.
Imna Along-ia o jembidang PWD minister Tongpang-i senti mapang agüja par yim semdangba atema pelaba metetdaktsü.
Imna-isa Japu yimer dang loktiliba asoshi tali tenendakba aser shilem tuluba agitsü ayongzük.
Neiphiu Rio lenisüba kübok tesüiba ita 11 tsüngda temelenshi tajung aika ajuruogo aser maneni tarutsü nunga temelenshitem alitsü imlar, ta paisa metetdaktsü.
Iba lenmangji Japu yim süngküm nungi Mangkolemba lenjem tashi ajak agi kilometer 3 shi lir.
Iba lenmang lapokba sentong nung teyari tenla agüja arua adenba asoshi yimten lennirtemi kanga pelaba osang ka Japu yimteni metetdaktsüogo.