PWD Minister-i Kohima nung mapa inyakba reprangdang

Dimapur, Rongchii (April) 14 (TYO): Public Works Department Minister, Tongpang Ozukum-i Küptoknü (Honibar) Kohima nung gari lenmang yanglushiba tesemtem semdang.
Iba mapang Executive Engineer South Division, Kohima Hokato Sema-i anir department ketdangsertemi Minister Tongpang meina senzü.
State Secretariat lenmang nungi tenzüka gari lenmang yanglushiba maparen inyaker, ta tanü Executive Engineer-i Tongpang dang metetdaktsü.
Tzünglu aruba aser ali tashi maitba khurettem liaka ketdangsertem aser mapa inyakertemi kanga meranga mapa inyakba ngua tanü Minister Tongpang-i parnok dang pelaba metetdaktsü.
Paisa, Soul Harvest Church Daklane anasa retaining wall yangluba tesem semdang. Iba ya Naga Hospital Kohima aser Secretariat tsüngda tongtipang lenmang ka lir aser anentsüh agi anenzüka alu.
“Iba lenmang tekaratiba nung lapoktsü atema merangdar, anungji nübortemi koda masüba timtem arema atatsü mepishir,” ta Tongpang Ozukum-i ashi.