PWD minister Tongpang Ozukum-i Dimapur semdang

Dimapur, Rongchii (April) 20 (TYO): PDA sorkari Nagaland nung gari lenmangtem asoshi temulung agütsütsü ta nangzükba ama Küptoknü (Honibar) PWD minister, Tongpang Ozukum den tongti ketdangsertemi Dimapur nung department-i inyakba mapatem reprangdanga senzü.
PWD office nung osangbener den jembidang PWD minister, Tongpang-i “Department aser Dimapur district administration-i mesenzütsü atema tetuyuba agüjaka, public-i Nagarjan apu ajanga senzür. Iba apu tang teyangludak lir anungji nübortemi timtem angateta iba apu nung mesenzütsü mepishir” ta ashi.
Iba onük atema department-i district administration den jembiteptsü aser tetuyuba tasen kar agütsütsü. Iba apu nung lendong kar danga atalokra department-i khuret mabentsü, ta PWD ketdangser katia ashi.
PWD minister-isa Chathe ayong (Referral) nung temporary bailey bridge ka yanglubaji hopta ana tsüngda renemtsü, ta osang metetdaktsü.
Mongputeni (October) 2017 nung iba ayong temdanga main concrete bridge yanglutsü tenzük aser ibaji ita 18 lateta aliba tsüngda yangluzüktsü, ta paisa shisem.
Balijan-Niuland sendaktepba concrete culvert slab yaküm tzü agi pongdok. Iba atema department-i ayong tzü ayimba
Minister Tongpang-isa DMC slaughter house anasa Ballu ayong nung apu yangluba, Dimapur state stadium nung mixer plant aser Dimapur kübok tesem balala nung gari lenmang yangluba tesemtem semdang.
Foot Hill Road yangluba dak sendakba atema olen ka lemsatepdang, taoba mapang iba mapa atema Special Plan Allocation (SPA) kübok sen lemzüktsü saka Planning Commission anenba aser NitiAyog tenzükba ajanga SPA kübok sentong ajak anenogo, ta PWD ketdangser kati ashi.
Iba mapa inyaktsü atema Centre dang nungi teyari meshitsü tebilemba lir kechiyong iba ya Naga nunger atema kanga dang tongtipang lenmang ka lir, ta Tongpang-ia ashi.
Nagaland nung PWD lenmang anepalutsü atema sen crore 102 lemzüktsü saka tang tashi nung state sorkari department nem sen crore 50 dang agüja lir. Mezüngbuba shilem atema sorkari sen crore 25 lemzüktsüba nungi Dimapur nem sen crore 5 agütsüogo, ta ketdangserisa shisem.
Department-i Road Maintenance Policy kübok Task Force ka tentetogo aser iba nung department nung tongti ketdangsertem dena lir.