PWD Minister, Wb. Tongpang Ozükum-i Mon semdang

Dimapur, Monupii/May 04 (TYO): Nagaland PWD Minister, Tongpang Ozukum-i state kübok district balala maneni semdanga Monupii (May) 4, 2018 nü Mon semdanga yangji gari lenmang teyanglushidak reprangdangogo.
Pai Mon jila semdangba mapang nung Mon nung PWD (R&B) ketdangsertemi pa dang lenmang timba ka nung ongken atepba maparen tembangogo aser bituminous mapa dang inyaktsü anünga lir, ta metetdaktsü. Mapa junga inyakba agi melungsüa Minister-i ketdangsertem nem tenüngsang agüja liasü.
Ano Housing & Mechanical, Mon ketdangsertem aser tanga divisions-ia Minister dang parnok timtem balala lemsatepa liasü.
Minister-isa Mon nung PWD Store semdang, aser iba mapang nung ketdangsertemi pa dang Store telongtet nung ali atsünga agiba indang metetdaktsü.
Mechanical Department-ia Minister dang Store telongtet nung Mechanical department atema Working Shed cum Garage ka nüngdaker ta metetdaktsü, aser iba dak sendakba nung Minister-i SDO (Mechanical) Mon dang proposal agutsütsü metetdaktsü.
Tesülen Minister-i EE (R&B) Mon Division office semdanga ketdangsertem aser District administration den senden ka mena liasü.
Senden nung Minister-i PDA sorkari temelenshi bener arutsü indang metetdakja ibaji ataloktsü atema ketdangsertem dang amalitepa inyaktsü mepishi.
“Onoki engineer tem nem junga inyakdaktsüner aser iba atemaji onoki department nem mapa lemzüktsüogo. Iba ya engineer ajak asoshi tetendangba ka asütsü, anungji nenoki nenok mapa tajung sayutsüla,” ta Minister-isa metetdaktsü.
Senden nungsa Minister-i DC Mon, K. Thavaseelandang gari lenmang yanglushiba maparen nung Department nungita yaritsü aser sorkar li kümzüka ayutsü atema inyaktsü metetdaktsü.
SE (R&B) Mon Circle, Tiameren-ia Minister-i Mon semdanga nüburtem atema bilemja inyakba atema pelaba lemsatep.
Gari lenmang semdanga reprangba mapang nung Minister den Mon (R&B) nung engineer tem, Aboi, Naginimora aser SDOs R&B, Mechanical & Housing, Mon aser Phomching division, EAC Mon, OSD to Chief Minister aser NDPP ex-candidate, Awan Konyak nunger densema liasü.