PwDs temeden indang awareness campaign tenzükogo

Kohima, September 19, 2019: Brihostibarnü Nagaland Civil Secretariat conference hall, Kohima nung Chief Secretary Nagaland, Temjen Toy-i Rights of Persons with Disabilities Act 2019 Awareness campaign tenzüktsüdang tangokba noksa nung angur.

Kohima, Rongjui/September 19 (TYO): State sorkar ketdangsertem atema Rights of Persons with Disabilities (RPWD) Act 2016 indang Sensitization & Awareness campaign tanü Nagaland Civil Secretariat conference hall, Kohima nung state Chief Secretary, Temjen Toy-i tenzüktsüogo; iba sentong ya anogo asemn agitsü, ta ketdangsertem osang ka ajanga metetdaktsü.
PwDs tem temeden indang rajema kümdaktsütsü nükjidong nung Mission Mode Team, Accessible India Campaign-i Office of State Commissioner for Person with Disabilities den senteper iba sentong ya ayongzük.
Iba sentong nung jembidang Temjen Toy-i, “Naga nungeri asenok dak ajangshibatem süra item temedentem meteter, ajisüaka tangar temeden atemabo mesükshir,” ta ashi.
“Matamabensartem i ajangshibatemji asenoki kodang shisadanga asadangdir, idangjiang iba campaign anentsü,” ta pai ashi.
“Paisa PwDs tem temeden balala lir, aser iabaji asenoki pelaa agizüktsüla aser parnok temeden akhümtsübutsüla. Public kiojen aser office building tem nung maonga balalka agütsütsü atema Social Welfare Department-i departments balala nem aiaben metetdaktsüogo, ajisüaka mapa küma junga meinyaker. Directorate, districts aser public buildings nung department balala inyakba ketdangsütsü atema iba Team tentet,” ta pai metetdaktsü.
Tang nungibo office memorandums aser sangdong ajakji telatetba nung aliba ama website nung update asütsüla aser state nung public kiojen ajak nung PwDs nem maongka agütsütsüla, ta pai ashi.
Temjen Toy-i, iba campaign tenzükba ajanga department ajaki PwDs tem nüngdak balala angateta inyaktsü imlar, ta ashi.
State Commissioner for persons with Disabilities, Diethono Nakhro-i power point presentation ajanga iba Act aser teinyaktsü mapatong metetdaktsü.
Iba Act metetdaktsüdang lai, RPWD Act 2016 nung matamabensaba tapu 21 indang shia lir aser iba Act kübok chapter 17 aser Arrla 102 lir, aser iba Act kübok sorkari fund agütsüba mesüra recognize asüba shisaliok reju ajaki PwDs tanur arishi küm 6 nungi 16 tashi shisaliok agütsütsüla, ta metetdaktsü.
Laisa, sorkari PwDs pur skill development aser mapa angutsü atema inyaktsüla, aser item rongnung loan agütsüba, training agütsüba, transportation, information & communication densema lir; PwDs temeden anema inyakba ken otem atema district shia nung special courts lemzüktsütsüla, ta metetdaktsü.
Diethono-isa, Nagaland nung iba Act kübok inyakba jenjangji tazüngla level nung lir aser disability dak sendakba current data mali, ta ashi.
Nagaland nung disability ozüngtem atema inyakba record junga mali, aser linük nung disability rehabilitation facility resource centre ka danga junga maliba state ji Nagaland dang lir, ta lai metetdaktsü.
Kasa sentong nung Director, Prodigal’s Home, Dimapur, K. Ela-i Nagaland nung PwDs jenjang, tayongzükbatem aser maongka balala indang metetdakja liasü.
Laisa, matamabensartem nüngdak balala reprangteta inyaktsü atema asen nüburtem anem junga angatetdaktsütsü nüngdaker, ta ashiba den külemi state nung RCI (Rehabilitation Council of India) training centers nüngdaker, ta metetdaktsü.