Pyongyang medenaka, alimai nuclear senden ayonga amentsüla: Park

Seoul, January 22 (Agencies): North Korea-i shilem agitsü memulung aka, alima tashi abenba linüktemi tang anena aliba Pyongyang-i tenzüka aliba tongpang nung amshitsü nuclear osettsüset yanglua kasaji tendanga rizüngba maparen anentsütsü senden ayonga amentsü tajungshiba olen ka South Korea Tir, Park Geun-hye-i tanü Hokolbar nü metetdaktsüogo.

“N Korea den sentakba nuclear mapatong anentsütsüji kanga temelabo masütsü. Ajisüaka, par linük medensemba linük 5-i arok senden amenba densema, Pyongyang’er nuclear mapatong anentsütsü tasa aser lenmang balala bushitsüla,” ta lai shisem.

Linük 6 densemba teloki küm 7 tejaklen nungi tenzüka Pyongyang’er nuclear mapatong anentsütsü asoshi mera tajung magitetba atema tezüdanga bilemba olen ka laisa lemsatepa liasü.

“Taoba mapang linük 6 densemba teloki jembitepba senden amenba ajanga Pyongyang’er nuclear mapatong anentsütsü meranga aru saka iba sendenji joko memeni mapang talangka arur. Ano, jembitepba agi dangbo par nuclear mapatongji manentsütettsü akok kechiyong tanü tashi nung senden amenba tajangzük tajung ngua mali,” ta Park-i metetdaktsü.

N Korea, S Korea, US, China, Japan aser Russia nunger densemba teloki taoba mapang, 2003 küm nungi tenzüka Pyongyang’er nuclear mapatong anentsütsü senden amen tenzük saka alima tashi abenba linüktemi par linük anema tenokdangba sentong balala benokba yong Pyongyang-i 2009 küm nungi tenzüka iba senden nung shilem agitsü memulungi aküm.

Pyongyang-i tongpang nung amshitsü nuclear osettsüset tendangba yong alima tashi abenba linüktemi par linük anema tenokdangba sentongtem tanga benoka lir.

Iba sülena Pyongyang-i par nuclear oset tanabuba tendang aser tan January ita tetenzüklen tendangba densema, tanü tashi nung par linüki nuclear oset 4 ben tashi tendangogo.

N Korea-i nuclear senden amentsü mulungba olen tawa metetdaktsüogo saka par linüki tenzüka aliba nuclear mapatong anenba sülen ang par linük den nuclear senden amentsü bilemba olen ka US-ia metetdakja lir.