Qandeel Baloch tepsetba atema tedi apu

Islamabad, July 17 (Agencies) : Pakistan nung social media star Qandeel Baloch tepsetba atema tedi puogo ta Deobarnü police-i metetdaktsü.
“Hokolbar aonung Qandeel Baloch tepsetba atema tedi Muhammad Wasim police-i puogo. Wasim-i tenu tepsetba nangzükogo. Par kibong maaksü nungi jenbutsü atema pai tenu tepset ta nangzük” ta Multan City police tanishir, Azhar Akram-i osangbener dang ashi.
Tawa tu Baloch-i Faecbook nung ashishitep aketba video kar sayuba nung ajemdaker la tepset ta Wasim-i police dang ashi.
Paisa ashiba agi, pa tenu nem mejanga aoba mozü chidaktsü aser iba sülen teka agi lenset.
“Hao ni la lenset. Ozü tsüraburtem ki temalen mejanga orr liasü. La ki tsünglanglen liasü aser aonung 10:45 ako meta ni la nem süngjang ka chidaktsü aser iba sülen ni la tepset” ta Wasim-i osangbener dang ashi.
“Ni inyakba atema sasa mebilemer, kechiyong la indang yimyatsüyaji magizüktettsüsa liasü” ta paisa shisem.
Baloch indang tenüng shitakbaji Fauzia Azeem liasü aser lai Facebook nung taaktsü maketba olen sangdongba aser noksatem sayuba atema la kanga nüngtugu aküm.
Pakistan linük nung tetsürtem talenba aika lir saka item talenba anema noktakba aser tebilemba lemsatepba atema nisung aikati la aitsü.