Qatar Open nung shilem magitettsüsa akümer: Serena

Doha, February 16 (Agencies): Tetsür tennis asayar World No. 1, America tsür, Serena Williams-i tan February ita 21 nü nungi tenzüka asayatsü ayongba Qatar Open nung shilem magitettsüsa akümba osang ka tanü, Mongolbar nü metetdaktsüogo.
“Ni imra agi tonga temang mejungi akümba yong ni Qatar Open asayamong nung shilem magitettsüsa akümer ta temulung shiranga lemsateper,” ta arishi küm 34 tain Serena-i ashi.
Russia’er tetsür tennis asayar mongin, Maria Sharapova teka yirua iba asayamong nung shilem magitettsüsa akümba osang sangoktsür hopta ka shi lir külen Serena-ia tan asayamong nung shilem magitettsüsa akümba osang ya metetdaktsür lir.
“Serena densema, tongti tennis asayar ishikati shilem magitettsüsa akümba yong tan asayamong ya imlaba ama jangratemsüka masütsü akok,” ta Tournament Director, Saad al-Mohannadi-ia metetdaktsü.
Serena-i 2013 Qatar Open final asaya nung shilem agitsü jenjang angu saka Belarus tsür, Victoria Azarenka-i Serena tsükdakja final asayaji akok.
Serena-i shilem magitettsüsa akümba sülen tetsür World No. 2, Romania tsür, Simona Halep-i Serena melenzüka la Qatar Open nung temaba jenjang abener asayar kümogo.
Halep den külemi, Garbine Muguruza, Agnieszka Radwanska aser Petra Kvitova nungeria Qatar Open asayamong nung shilem agitsü renema lir.