Quang-i Vietnam Tir tasenba akümtsü tenangzükba agir

Vietnam yimtiba, Hanoi nung tentetba Parliament House nung Vietnam Tir tasenba, Tran Dai Quang-i Tir inyaktsü tenangzükba agidang agiba noksa ka yangi angur. (Hanoi, April 02)

Hanoi, April 02 (Agencies): Vietnam National Assembly yimsüsürtemi par Tir tasenba inyakdaktsütsü asoshi shimba sülen Tran Dai Quang-i Vietnam Tir tasenba akümtsü tenangzükba tanü, Honibar nü agiogo.
Küm 5 nung khen amenba Communist Party Congress nung Vietnam Tir menden bendaktsütsü asoshi tenüng shimoksang, Quang-i tanep parliament nung agiba Tir shimba sentong nung vote noklang nung shilem 91.5 ngua temaba jenjang anguba sülen pai Tir tasenba akümtsü tenangzükbaji agia liasü.
Quang-i tan Tir menden benokba sülen US Tir, Barack Obama den ajurutepa par linük ana tsüngda tesendaktep tajungba küma yanglushitsü alizüng yua lir.
“National Assembly yimsüsürtemi Vietnam Tir menden abentsü asoshi ni shimba atema kanga pelar,” ta Hanoi yimti nung tentetba Parliament kilung nung Tir inyaktsü tenangzükba agidang Quang-ia metetdaktsü.
Vietnam yimsüsürtemi tan Brehostibar nüa par parliament mendenbula inyaktsü asoshi arishi küm 61 tain Nguyen Thi Kim Ngan shima liasü.
Ngan shimba ya Vietnam-i par parliament mendenbula inyaktsü asoshi tan mezüngsüa tetsür yimsüsür shimer lir.
Communist yimtsütsü yimya benshiba Vietnam linük ya Secretary General, Tir aser Ato Kilonser densemba lenir asemi aniba linük ka lir.
Politburo yimsüsür 19 tashi shima parnoki lenir asem den yaritepa par linük madak yimsü asür.
Vietnam National Assembly-i maneni Nguyen Tan Dung melenzüktsütsü asoshi Ato Kilonser tasenba taruba hopta shimtsü sentong renemba osang jangjaogo.