Quarantine nung amongertem

Tang alima nung nübortem Covid 19 tashidak agi kangshiba mapang ya meimlaba mapa aika adoker aser item mapatem rongnung bendanglen nungi arur asen nübortem pei kidangi indangindanga moudaktsüi anogo terpezü tesem balaka nung mongdaktsüba ya asütsü. Iba tesem dangji quarantine center ta ajar, tetezü tashidak alinunga ta temulung melemi bilemba agi tangar dang nungi pilaa tesem balaka nung mongdaktsür. Iba jagi asenoki ashibanger aser anemponger saka tesempatsü aser tetsübutsükabo mebilemtsüla. Alemli Tsüngrem temeim memetetba mapangbo meimlaba alima lendong nung asü ama ajururtemji menen agi asü ta jembi aser tasür kinungertem dena pei kidang melitettsüsa yimtak nungi pilar amongnü asang tu agi ki yanglur lidaktsü. Ibaji tashibangtsüka liasü, anungji parnok nem chiyongtsü agütsütsübajia tonga moi dang lilang nungi dang peretdaktsü. Tanü asenok aikati quarantine center nung alirtem ya akhidang menen agi asür kinungertem yimtaka melidaktsüi among nung ki mashi ka yanglua doktsür mongdaktsürtem amai bilemer. Iba jagi kanga ashibanger aser parnoki asenok anema langka tai ka inyak ama bilemer. Aji oda, yimtsüng kar nungbo yim adena orr among nung refugee camp amai yanglua yutsüba angur aser karibo yim süngküm atsübanga ayur. Ibaji, kodang jungjunga bilemdangdir, temulung ashitsüka lir. Atangji, asenok parnok anasai maotsü aser külemi meyoktepa mamongtsü, saka asenok dak parnok sempaba aser ashibangba shisatsü aser tangatetbabo malitsüla. Bendanglen nungi arurtemji tangar masü asen nisung aser asen kinungertem. Parnok kar mapa inyaker aser kar tazünger, parnok ajakji senso tajungtem lir. Item jagi kidangi sen yokba agi aser arogo nem tenla sen bendaktsüba agi kibong aika Nagland nung anisüngzüka alir aser arogotem dang masü saka lokti dena teyari angur. Ano, tazüngertemjiang asüng lenir akümtsü. Aji oda, bendanglen alirtem jagiang pei senso limai rongsen bener arur, anungji asenoki parnokji akümtsübutsüla.Iba tangatetba jagi parnokji anogo kwika tesem balaka nung mongdir mongang, akokba tashi tesem tajung ka nung tzü agi aser chiyongtsü agi dang masü saka metsümeshidak dena timmedemdaktsüi amongtsüsa anepalutsüla. Iba tangatetba nung arogo aser yim indang rest house aser tourist lodge ajak quarantine center akümtsüla. Atangji, koba tesem nung südir süaka nisung ajaki junger ta asütsüsabo meinyaktetsüa akok, kechiyong taginüba aser nüngdak balala aser chiyongtsü nunga tebang memedemtsü, anungji bendanglen nungi arurtemia aji angateta taküm piyong amongtsü masüji, anogo ishika atemabo aremzüka amongtsübaji kanga tongtibang asütsü. Kena, tanübo alemli ama masü smart phone nung asenoki reprangnüba aser züngnüba noksa aser otsü ajak angur, anungji qurantine center nung amongba mapang ya itemji reprangba aser azüngba ajanga shisatsü renlokba aser agazükba mapang tajung ka asütsüla. Achiajem nung mazüoktettertem asoshia ibai taküm melenshitsü asoshi mapang tajung ka südaktsütsüla. Ibaji angatetra, nisung aika asoshi quarantine center nung amongbaji asentenshi sentong ka nung amonger ama temoatsü mapang ka asütsü. Quarantine center nung amongertemji shiranger masü, temang tendanga amongertem dang lir, anungji parnok amongdakji parnoki inyaktettsüsa mapa lira, itemjia inyaka mongtettsü. Rajasthan nungbo parnok nisung bendanglen ayangertem kar meyipa aruagi school ka nung quarantine center kümdaktsür amongba mapang, anogo paikaji kazüa meliteti rong aser brush alidaktsür school ajakji tasen küma teptsüba social media nung nguogo. Ano, kasa tebilemtsü indang social media nung sensaksemdang, karibo quarantine nung amongertem nem kari soruchioka agütsüba dang nungibo parnoksasa soruchioka chiyongdaktsüba tajungba asütsü ta shisatsü tasen bener arua lemsatepa ngugo. Itemji ajizüka aser bilemdanga asenokia mapa küma inyaktetba nungbo quarantine center ya mapa kecha maka chiyongli kazüli aser complaint süli ta asüba tesem ka masü saka mapa angazükdak aser mapa inyakdak tesem tajung ka küma tenzüktettsü. Anema alir ka asoshi kecha meinyak anogo 14 nü dang masü ita junga kilong nung amongtsübaji, shingaia memerenshiyonga, pa mesüra la atemabo ibaji temerenshi tuluka asütsü. Ibaji bilemdangbo Quarantine center ya Skilling Center-ang ka kümdaktsüner.