Queen Elizabeth arishi küm 90 ajungdang alima otsü ka yanglutsü

London, April 20 (Agencies): Brihostibarnü, April 22, 2016 nü Queen Elizabeth arishi küm 90 ajungba anogo nung Bell ringers-i Britain nung Tenla ki tulutiba, Liverpool Cathedral nung World Record ka yanglutsü merangtsü.

Züngsem nisung tenet aliba tsüngtsüng atemertemi alima nung tarettiba tsüngtsüng trok ghonda pongu tashi atemtsü.

La Princess Elizabeth alidang lai 1951 küm mezüng iba Cathedral semdanga tsüngtsüng atemtsü atema officially signal agüja liasü, iba sülen küm 65 lir tang otsü tasen ka yanglutsü meranger, ta Xinhua news agency ajanga metetdaktsü.

Tsüngtsüng atemba kodang tenzükdir par teloki tangar den teka memelentepi aser khen danga maneni temelenshi 5,000 tashi atemtsü.

Tsüngtsüng tulutiba, tenor tsüngtsüng, koba dang Emmanuel ta ajar, iba tsüngtsüngji touzük ton pezü lir aser metong aser telungtet naprong tasazük metre 2.5 lir, aser ibaji nisung anati atemtsü. Tsüngtsüng trokpronglaji senteper touzük seret 13,000 jungnüa lir.

Cathedral Guild of Change Ringers nungi Len Mitchell-i, “Queen asoba anogomung nung onoki iba ya merangdangtsü, la onok Queen akumtsü küm ka lia lai mezüng ‘peal of the bells’ tenzükja liasü,” ta ashi.

Item tsüngtsüngji 1930s mapang Cathedral tower nung yua liaka World War II ajanga ibaji metemi ayu aser 1951 küm November 17 tashi metemi liasü.

“Iba Cathedral nung tsüngtsüng 13 lir, itemji alima nung tsüngtsüng tarettibatem lir. Tsüngtsüng aliba takdangji ali nungi feet 220 temalen lir asunung, ibaji alima nung tsüngtsüng talangtiba nung ayubatem lir,” ta paisa ashi.

Cathedral-i tsüngtsüng 14bubajibo kangabo mamshi. Chuba asüba mapang nungang Great George-i khenkhen iba tsüngtsüng amshi. Iba tsüngtsüngji touzük seret ton 14 dak tali lir aser British Isles nung tsüngtsüng tulu tarensen asembuba nung lir.