Queen Elizabeth II Britain madak mapang talangba yimsü asür chubatsür akümer

Britain chubatsür, Queen Elizabeth II (Achijilen, tanabuba)-i Prince Phillip (Achijilen) den aroki Edinburgh Waverley Station tanü Bodbar nü tonga aoba sülen Scotland’er First Minister, Nicola Sturgeon den sensak asemba noksa nung angur. (Edinburgh, September 09)

 London, September 09 (Agencies): Britain chubatsür, Queen Elizabeth II Britain madak mapang talangba yimsü asür chubatsür küma tanü otsü tasen ka yangluogo.

Arishi küm 25 tain alidang nungi tenzüka Britain chubatsür menden nung amentsü tenzükla, arishi küm 89 tain Elizabeth-i tetsü, Queen Victoria-i Britain madak küm 63 ser ita 7 yimsü asüba mapang ajangteta tanü otsüji yanglu.

Britain chubatsür, Queen Elizabeth-i otsü tasen yangluba nüngtem nung Britain ajungai pelatepa benjungmong amongtsü tajungshiba olen ka Britain Ato Kilonser, David Cameron-ia tanü metetdaktsü.

“Asen chubatsür, Queen Elizabeth-i küm 63 tashi Britain madak yimsü süa arudang Britain-i tejakleni mera tajung agitsüsa lai asen Britain aniogo. Ano, lai bendanga agüja nüburtem tenzükba atema Britain den külemi, alima ajungai la nem tetushi agütsür,” ta pai ashi.

Elizabeth-i tanü otsü tasen yangluba nüngtem nung Buckingham Palace-ia taoba Beatles telok züngsem, Paul McCartney’er jala, Mary McCartney-i agiba chubatsür Elizabeth indang noksa ka tanü sayaba osang jangjaogo.

Elizabeth-i Kenya tezülen semdanga alidang, tebu, King George VI asüba osang 1952 küm angazük aser lai iba kümjisa Britain chubatsür menden benok saka la chubatsür akümba sentongbo tesangküm, 1953 küm ang agia liasü.

Elizabeth tang tain nisung ka akümba yong lai bendanglen semdanga senzübaren ajema inyakba osang jangjaogo.

Ajisüaka, lai la nem chubatsür ka ama nungloktsüba khuret aser mapa ajunga tangasa bendanga agüja inyakba osang bushiteta lir.