‘Queen Elizabeth II-i Princess Diana yarinüa liasü

London, August 17 (Agencies): Queen Elizabeth II0i lar jabaso kinüngtsü Princess Diana kibong akümba nung mepelai aliba asoshi yarinüa liasü, saka lai tanotsür (Diana) ji koma yaritsü, ibaji memeteti liasü, ta kaket tasen ka ajanga ashi.

Queen aser Princess Diana na mapang talangka tesentaktep mejungi aliba osang aika lir aser tawa kaket tasen ka ajanga tena tesentaktepji taliba jungkai adoktsüogo.

‘The Queen’s Speech’ kaket zülusang Ingrid Seward-i, 1981 küm Prince Charles aser Diana na kibong akümba mapang la arishi küm 20 dang liasü aser la kinüngbo tetsü Queen Elizabeth arishi küm 55 liasü, aser ibaji ajanga tena tsüngdang ongdang (generation gap) tulu aliba indang zülua lir.

“Queen-i Diana kanga yarinüa liasü, saka lai koma yaritsüa lai memeteti liasü, aser Diana-ia Queen den ama-meliteptet,” ta Seward-i ashi.

August 31, 1997 anepdang Diana gari lendong nung süogo ta Queen nem metetdaktsüdang Queen-i, “Nisung kari gari brake nungji ‘grease’ enoktsü südi,” ta ashiba kaket nungji zülusema lir.

‘The Queen’s Speech’ kaket ya August 27 nü sayatsü.