Queen Elizabeth II kinungbo Prince Phillip süogo

London, April 9 (Agencies): England Chubatsür, Queen Elizabeth kinungbo Prince Phillip süogo, ta Hokolbarnü Buckingham Palace-i metetdaktsüogo.
Prince Phillip dang Duke of Edinburgh ta ajar aser pa arishi küm 99 liasü.
“Her Majesty The Queen-i kanga dang temolung raksaa la kinungbo His Royal Highness The Prince Philip, Duke of Edinburgh asüba osang metetdaktsür. His Royal Highness tanep Windsor Castle nung tiptema dang amozüka ogo” ta British Royal Family-i sangdong ka nung metetdaktsü.
“Royal Family-i alima nung nübortem den külemi pa asüba mangyimer” ta parnokisa ashi.
Prince Philip ya tawa tu London nung aliba King Edward VII’s Hospital nungi anizüka liasü.
Prince Phillip ya June 10, 1921 nü Greece nung aso. Pa ya Greek nunger chuba jabaso liasü aser 1947 küm pai Elizabeth den kibong aküm. British putiotsü nung Chubatsür kinungbo arishi talangtiba aliba pa asütsü.
Pa dang Duke of Edinburgh ta aja aser Queen Elizabeth-i küm 69 tashi yimsüsüa arudang pai pa kinungtsü nungita aruogo.
Prince Philip aser Queen Elizabeth na nem tanur 4 moatsü. 1948 küm Prince Charles, 1950 nung Princess Anne, 1960 nung Prince Andrew aser 1964 nung Prince Edward aso.
Pai semchir 8 aser tanabuba semchir 10 toktsür alima nungi pilaogo.
Prince Philip asüba osang angashiba sülen nisungtemi Buckingham Palace kima nung naro yuja tetushi agütsü aser nisung aikati Windsor Castle semdanga akhümtsübu agütsü. Ajisüaka, British sorkari coronavirus wara nung ajemdaker nübortem dang lokti madenshitsü mepishia metetdaktsüogo.
Prince Philip den asüpila sentep sentongji St George’s Chapel, Windsor nung alitsü saka coronavirus wara nung ajemdaker inyakyim kar melenshiogo, ta College of Arms-i tanü sangdong ka nung metetdaktsüogo.
Duke of Edinburgh den asüpila sentongji state funeral masütsü. Asüpila sentep magidang pa indang mangji Windsor Castle nung dang ayutsü aser iba ya pai aginüba ama lir, ta College of Arms-isa ashi.