Queen Elizabeth II yimsüsüba anener Australia republic akümtsü akok

Canberra, December 18 (Agencies) : Australia Ato Kilonser Malcolm Turnbull-i, Queen Elizabeth II yimsüsüba anener külen ang Australia republic kümtettsü akok, ta ashiba Deobarnü osangbenertemi ashi.
Australian Republican Movement’s (ARM) küm 25 ajungba nüngtem nung aonung sangwa chiyungtepba mapang Turnbull-i, chubatsüri yimsü asü tashibo Australia nungeri republic menungittettsü, ta ashi.
Ajisüaka pai tarutsü mapa atemaka kecha jembizüka mayu, ta Xinhua osang ajanga metetdaktsü.
1993 nungi 1999 tashi republican movement nung Turnbull tekolakba liasü.
“Queen Elizabeth II-i yimsü asü tashibo Australia nungeri tanga yimsüsüba yimya magizüktsü ama ni bilemer,” ta Honibar aonung Turnbull-i ashi.
Pai, Australia linük republic akümtsüji mapang agitsü aser yamaji inyaktsü atema kangasa junga shisadanger Australia nunger ajaki akhanga nungittsü nüngdaker, ta shisem.
“Iba dak sendakba nung nüburtem taginüba metetpelatsü nüngdak aser ibaji ajanga parnoki bilemba jangjatettsü,” ta paisa ashi.
Tang ARM nung tekoklakba, Peter FitzSimons-i, parliament nung republic pusemer timba lir, ta tan mezüng metetdaktsüba sülen, Turnbull-i item o ya jembia liasü.
Turnbull-i Honibar aonung item tekümdangtsü ashiba sülen FitzSimons-i iba tebilemtsü shitak ta agizük.
“Pa asen Ato Kiloner lir, pai ajangshiba nung ajemdaker pai asenok dang aibelen masütsü ashir kechiba süra ano tenem talangbaka soa atutsü anünga lir,” ta FitzSimons-i ashi.
“Ni iba dak sendakba nung shinüba o kaji ….asenoki iba tenemlakji atongtsü merangdar aser asenok dak tejangraba tulu lir,” ta paisa ashi.
Iba sentong ya linük nung opposition lenir, Bill Shorten-ia nüngiter.
Shorten-i, “Asenok ajak lungjemer Australia nung tekolakba shimdi,” ta social media ajanga lemsatepogo.
1999 küm Australia-i republic akümtsü atema vote agitepba nung Britain chuba tsür yimsüsüba nungi tera agi matsüngin.