Queen’s Club asayamung nung Dimitrov aser Cilic nati shilem agitsü

London, Metsüremi 06 (Agencies): Wimbledon atema terenemshiba ka ama taoba mapang London nung tennis jangratema asayaba tem bilemteta, Bulgaria nunger asayar Griogor Dimitrov-i Aami (June) Queen’s Club asayamung nung shilem agitsü renema lir.
World no. 4 Dimitrov iba asayamung nung Marin Cilic den külemi shilem agitsü, shiba tang terenemshiba mapang ka lir.
Taoba Yimpoksüi (November) London nung ATP World Tour Final asaya Dimitrov-i koka liasü, aser pa ashoshi tennis asaya nung takok rongnung iba title ya tulitiba alitsü. Pai 2014 Queen asayamunga koka lir aser Wimbledon nunga semi-final tongtetta asayaogo.
“Ni sapuba asayamung rongnung Queen’s Club Championship ya ka lir, iba asayamung indang otsü aika lir aser grass court nung asayatsüba ya küm peyong nung mapang tajungtiba lir,” ta Dimitrov-i ashi.
Taoba küm Queen asayamung final nung Cilic-i Feliciano Lopez makok aser Wimbledon final asaya nunga Roger Federer-i pa tsükdaktsü. Maneni taoba küm Australia Open asayamung final nunga Federer den set pungo tashi asayar pai makok.
Maneni, world no. 2 Spain nunger asayar Rafael Nadal-ia iba asayamung nung shilem agitsü asoshi jangjaogo aser Britain nunger Andy Murray-ia iba asayamung nung shilem agitsü akok. Pai iba asayamung pungoben tashi koka lir.