Quetta bomb lendong nung nisung 8 pokset; 40 shi yiru

Pakistan anülulentip tsütsülen, Quetta yimti nung pokshiba lendong tesashi ka tanü, Honibar nü atalokba sülen ketdangsertemi tanü lendong nung yirur ka tezüleni anir aoba noksa nung angur. (Quetta, February 06)

Quetta, February 06 (Agencies): Pakistan anülulentip tsütsülen, Quetta yimti nung pokshiba lendong tesashi ka tanü, Honibar nü atalokba osang ka ketdangsertemi metetdaktsüogo.
Pakistan’er paramilitary kübok densemba Frontier Corps sepai gari convoy kati yimti tiyongtsü ajangdang tanü lendongji atalokba osang jangjaogo.
“Tanü lendong nung ishiba agi nisung 8 poksetba aser nisung 40 dak tema yiruba osang tang tashi nung jangjaogo. Ajisüaka, tan pokseta asür aser yirur rong nung sepai kwi aser nübur kwi densem iba osangbo tang tashi mejangjateti lir,” ta provincial home secretary, Akbar Durrani-i osang jangjashitsü.
Tan lendong atalokdak ya China nungi teyari agia, dollar sen billion 46 jenjang aketba China-Pakistan economic corridor tentettsü asoshi renemba Baluchistan province nung densema lir.
Ali telung nung rongsen jenti aliba province ka süaka, Baluch kin nung medensemba kintemi küm 10 tejaklen nungi tenzüka Pakistan sorkar anema raraba ajanga Baluchistan ya Pakistan kübok densemba province ajak rong nung sensaktiba aser terenlok tajemba aliba province lir.
Pakistan mitkartemi par mitkar mapa inyakba dak atemer Baluchistan nung nüburtem tashiyim agi pua anir aoba, parnok rishikangshiba, sorkar anemer ta temulung melemi bilemba nisungtem tepsetba aser iba amala nüburtem nem agütsüba temeten anema inyaker ta nübur temeten asoshi nokdakba tentet balalai metetdakja lir.
Taoba January ita nunga Baluchistan province nungsa amakba lendong balala atalokdakja Pakistan mitkar züngsem 5 aser par tzüyim sepai züngsem 2 tashi tepsetba den külemi, Quetta nung tenteba polio mozü agütsüdaka pokshiba lendong ka atalokdakja ishiba agi nisung 15 shi poksetdakja lendong ataloktsüba osang bushiteta lir.
Ajisüka, tanü lendong atalokdaktsüba atema telok shingaia tang tashi nung tenüng agia metetdakja mali.