Quetta lenmang anasa bomb tesashi apok, police aika pokset

Islamabad, October 18 (Agencies): Southwestern Pakistan nung aliba Quetta yimti nung suicide bomber kati police ketdangser tenet pokset aser 22 yirutsü.
Iba lendong ya iba yimti nung aliba lenmang tulutiba Saryab road nung police tem mena aliba gari ka nung tenük yoker Bodhbar anepdang pokdaktsü, ta police ketdangser Muhammad Akbar-i osangbener dang ashi.
Iba lendong ajururtem ya police ketdangsertem rungnunga tajungtem aser takotet tem lir, ta lendong adalokba tesem nungi osangbener den jembidang provincial home minister Sarfaraz Bugti-i ashi.
Police tanishir trok aser civilian ka asü aser parnok 22 yiru, ta iba province indang chief minister Sanaullah Zehri-i yirur alirtem anepaludak mozüki nungi osangbener dang ashi.
“Suicide bomb pokdaktsüsang ya gari nung bomb tuozük seret 70 nung 80 tsüngta bener liasü,” ta Zehri-i ashi.
Iba tesem nung tangokba television nung sayuba noksa nung truck ka lenmang nung kanga mejungi poksar aliba angu. Iba lendong adokba den külemi police temi iba tesem mita bushi.
Quetta ya Balochistan province indang yimtiba lir aser iba tesem nung tamangba yimsü telok nungi prangbong bena alir Tehreek-e-Taliban (Pakistan Taliban ta ajar) aser ethnic Baloch temi Pakistan nungi nüchiso meshia rara lendong agütsür.
“Balochistan nung nüburtem iba tongpang rara nung nokdaka lir,” ta Bugti-i ashi.
Bodhbarnü iba lendong agütsüba ya telok katia tenüng agia mali. Saka Balochistan nung Pakistan Taliban, Islamic State of Iraq & Levant (ISIL) aser tanga telok temi tanen maka lendong agüja arudagi.
Taoba hopta nunga iba yimti nung kin tajemba, Hazara Shia Muslim nunger dak lendong agüja nisung pongu taküm samatsü.
October ita tetenzüklen suicide bomber kati Quetta nungi kilometer 165 bilar aliba Jhal Magsi jila anasa Sufi tekülem ki ka amak aser iba lendong nung nisung 18 taküm sama.
Iba province nung küm aika Baloch rarartemi nüchiso meshia Pakistan sorkar den rara arudagi.
Panjgur district nung aliba China-Pakistan Economic Corridor (CPEC) kümzüka ayutsü asoshi arua aliba Pakistan nunger mitkar ana tepset, ta iba tesem nung telungpur telok tulutiba, Baloch Liberation Army ajanga hopta tetenzüklen shia lir.
Sen billion $56 jenjang CPEC project ajanga China nung aliba southwestern Xinjiang province nungi Pakistan ajanga arua Balochistan nung aliba Gwadar jila tashi shishilembaba lenmang yanglutsü.
Iba project kübok China nunger shishilembaba ya Arabian Sea indang shishilembaba lenmang, rail aser kiojen balala den sendakteptsü aser maneni Pakistan ajunga nung power generation project 19 yanglutsü sentong lir.