R-Day nung shilem magitsü: NSF

Kohima, January 23 (TYO): NESO nung adenba unit ka ama NSF-i India sorkar dang Citizenship (Amendment) bill 2016 anemba lenmang aisü ajanga metetdaktsügo, ajisüakla India sorkari Lok Sabha nung iba bill agizük aser Rajya Sabha nunga agizüktsü anüngdaka lir, ta tanü NSF Tir, Kesosul Christopher LTU aser tongti tezülur, Imiyapang Imsong kati sangdong ka ajanga metetdaktsü.
“Anungji onoki iba bill anemba temaitsü sayutsü atema NSF-i January 26, 2019 nü India nunger India nunger Republic Day anogomong nung shilem magitsü. Iba dak sendakba nung Federating Units aser Sub-ordinate tentet ajak dang peipei tesem nung iba anogomong nung shilem magitsü tetuyuba agutsür. Iba denji külemi shisaliok rejutem aser kaketshirtem dang R-Day anogomong sentong dak sendakba sentongtem aser sorkar maparen kecha nunga shilem magitsü atema tetuyuba agutsüdaktsüner,” ta kasa sangdong nung shia lir.
“NSF-isa Nagaland sorkar dang osenkakettem nung sangdong agutsüba mesüra olepla agutsütepba ajanga nüburtem memangmangdaktsüi sorkari iba bill pusemer asü anemer, ibaji sangdongang ta takhangba agutsür,” ta NSF-isa metetdaktsü.