R Madhavan-i ‘Rocketry – The Nambi Effect’ direct asütsü

Aenjeti/January 21, 2019 (Agencies): Ananth Mahadevan-i mepaitoktetba maparen ka adokba ajanga Rocketry – The Nambi Effect film direct mesütettsüsa akümba sülen actor R. Madhavan-i iba mapa belenzükogo.
Mapang tatsüka tejakdang Madhavan-i iba film Mahadevan den külemi co-direct süa liasü, koba scientist aser aerospace engineer S. Nambi Narayanan taküm otsüdak ajemdaker yangluba film ka lir. Iba ya Madhavan asoshi director ka ama mezüngbuba film lir aser iba film nung paisa tongtibang shilem agir.
“Ananth Mahadevan ya kanga dang sempet tajung aketba film yanglur ka lir. Ajisüaka mepaitoktetba maparen kar adokba ajanga pai ‘Rocketry – The Nambi Effect’ film direct mesütettsüsa akümer,” ta Madhavan-i ashi.
“Rocketry film den ni kanga tesendaktep tajung lir. Film ya kanga junga adokdar aser Nambi Narayanan indang otsü alima dang ashitsü ni matateter,” ta paisa ashi.
Indian Space Research Organisation (ISRO) nung ketdangser tejen ka ama Narayanan ya cryogenics division incharge liasü. 1994 küm keno tai nung aija pa apu. Pa anema ken o benokba ya Central Bureau of Investigation-i 1996 küm agientsü aser Supreme Court-i 1998 küm pa aibelena mali ta obendang agütsü.
Osang ajanga ashiba agi, iba movie ya imlaba dang nungi takaraba odar koba Hindi, English aser Tamil oshi nung tangokdar. Film ya India, Princeton, Scotland, France aser Russia nung tangokdar.
Iba film ya taküm küm tatemlen sayatsü renema lir.