R. N. Ravi-i Naga nunger ajak longjemtsü ayongzüker

Kohima, December 8 (TYO) : Küm aika telatet mongui aruba Naga yimten tebilemtsü atema Centre-i süoki ia bilemtsür anungji Naga yimten teloktem ajak densema Naga nungertem longjemtsüla, ta Naga Peace Talks atema Interlocutor, RN Ravi-i ashi.
“Naga nunger sobalibaji khenyongi balaka aser nenok iba atema nüma tanga bilemtsüla aser nenok sobaliba wazüka ayuba den külemi ajungkettsüla” ta Hornbill benjung tenzüker anogo tibuba nung Ravi-i o jembidang ashi.
“Naga nunger sobaliba ajak meyokteper iba benjung telongjem nung amungba angudang kü mulung nung kongshir. Sobaliba ajanga maitsü balaka asüba rateta sayur, iba ajanga Naga nungeri pei lima meimba sayur” ta paisa ashi.
Naga yimjung ken o atema pa tiyongtsü nung ia jembir ka ama bilemdang, Naga nunger sobaliba balala temeyoktep benjung telongjem nung amungba angudang pa ajungmesor saka pai tebilemtsü khuret tongti süa abenbaji Naga lokti nung telemsa aliba atema lir ta Ravi-isa ashi.
“Sobaliba nung telongjem ayuba alia Naga nungertem tanga tsütsü nunga longjemtsüla. Sobaliba tsütsü longjemtetra, Naga nunger ajak longjemtsüji takoktsü lir” ta paisa metetdaktsü.
Prime Minister, Narendra Modi-i Naga nunger akhümtsübur aser pai Naga yimten tebilemtsü angatetteptsü atema tenangzükba agiogo. Naga yimten tebilemtsü atema telemtetbaji tangatettep nung aser kati ka akhümtsübutepa yanglutsü ta Modi-i jangjajangja shiogo, ta Ravi-isa ashi.
Paisa, taküm August 3 nü NSCN(IM) aser Centre tsüngda Framework Agreement indang onük jembidang, “Iba ya tetenzüker ka dang, kanga tongtipang aser temaitsü aliba inyakyim lir. Onoki ajak kasa aser tangatettep nung telemtetba ka bener arutsü atema inyaktsü lemtetogo.” ta metetdaktsü.
Paisa ashiba agi, “ni telok balala, Naga nunger yimten teloktem densema civil societies ajak den telongjem atema jembir. Naga nungertemi iba maongka agizüka langka tajung ka lemtettsü asoshi yariteptsüla.”
Tanü sentong nungsa Ravi-i Khristmas salem metetdaktsüdang, “Mapa shitak inyaktsü atema Tsüngremi asenok nem tangatetba agüjang. Pa tekabu ajanga asenok awabanger pa mulungba lenmangleni asenok aniang. Tsüngremer taochi asenok ajak madak lidakjangma ta sarasademer” ta ashi.
Naga nunger taginüba tongtetdaktsütsü atema R. N. Ravi-i nendaka inyakba atema Tourism Parliamentary Secretary, C Apok Jamir-i pa dang pelaba metetdaktsü.
Hornbill benjung nung adenba sülen Mongulbar anüngdang Capital Convention Centre, Kohima nung R. N. Ravi-i Nagaland aser Manipur nungi Naga kin balala nungi tongti teloktem den ajurutepa senden ka agi.
Senden agiba sülen pai osangbenertem den jembidang ashiba agi, iba senden ya Framework Agreement nung terata kar aliba angatetdaktsütsü atema liasü.
“Taoba mapang ni Naga Hoho, Eastern Nagaland People’s Organisation, Naga Mothers’ Association amala den ajurutepogo aser tanü tribal hohos den ajurutep. Parnok arua adenba atema kanga pelar aser ni parnok dang tekaratiba nung telemtetba ka agitsü ta shiogo” ta Ravi-isa osangbener dang ashi.
NSCN(K) noktangba atema ashidang, “parnoki ceasefire tenangzüktep raksa aser ozüng alema mapa inyaktsü tenzük” ta Ravi-i ashi.
“Centre sorkari ataa liasü saka June ita tatalokba sülen ang NSCN(K) noktang. Naga nunger mulungtet teloktemi mepishiba ama onoki parnok den tesentaktep yanglutsü merang saka parnoki magizük. NSCN(K)-i Manipur aser Assam nung aliba telungpur teloktem den tesentaktep yanglu aser ozüng alema mapa inyakba manen” ta paisa metetdaktsü.
Disturbed Area Act alitsü mapang atsülangba atema Ravi-isa ashiba agi, iba ozüng ya tesüiba küm 60 tashi linük nung lir aser onoki iba ya agientsü meranger, saka ceasefire agienba aser azütokshitep tensa ajuruba ajanga mapang atsülangshitsüsa aküm.
NSCN(K) anema mapa inyakdang sepaitemi civilian dak ozüng alema mapa inyakba atema paisa ashiba agi, “ozüng alema mapa inyakba ajakji benoka angadangtsü saka iba asoshi interlocutor ka ama ni oshidang magütsütettsü.”
May 2014 nung BJP sorkar tashi aruba sülen Prime Minister-i Naga yimten tebilemtsü atema ita 18 tsüngda telemtetba ka bener arutsü ta nangzükba atema asüngdangdang, Ravi-i ashiba agi “onoki onok tajungtiba agi meranger aser iba nung shilem agir ajak dena tekaratiba nung telemtetba ka agitsü atema inyakdar.”