R. N. Ravi-i NSCN-IM peace accord atema Manipur semdanger

Imphal, November 4 (TYO) : Naga yimjung olemtep nung Centre asoshi tiyongtsü nung jembir R.N. Ravi-i Manipur nung NSCN-IM peace accord tekaratiba nung tembanga inyaktsü atema Civil Society Organizations (CSO) züngsemtem den ajuruteptsü.
“Ni tanü Civil Society den sensaksemtsü atema yangi aru. Taoba mapang ni telok kar den ajurutepogo aser parnok den maneni jembidar” ta yashi Imphal Tulihal Airport tonga aruli Ravi-i osangbener dang ashi.
NSCN-IM-i state asem nung Naga nunger aliba tesemtem ketdangsütsü takhangba indang asüngdangdang Ravi-i ashiba agi, “Ibala takhangba kecha mali, aser iba olen ya komaser jembir ni memetet” ta langzü.
Taoba mapang Imphal Times-i leaked document ka nung ajemdaker NSCN-IM-i Arunachal Pradesh aser Manipur nungia Naga nunger aliba tesem kar anioksemer parnoki ketdang asütsü atema takhangba agütsü ta metetdaktsü.
NSCN-IM-i Assam-i Naga nunger agia aliba meyipa agitsü aser Assam sorkari taa agüja aliba lushi meyipa agitsü takhangba agütsür ta Imphal Times-isa metetdaktsü.
Manipur nung Civil Society Organisation tongtiba ana – All Manipur United Club Organisations (AMUCO) aser United Committee Manipur (UCM) nati Ravi den ajurutepa senden agitsü.
AMUCO general secretary Phurailatpam Devan-i ashiba agi, parnoki sorkar atema o jembir nem tezüluba kecha magütsütsü saka parnoki taoba mapang pa nem agütsüba takhangbatem indangdang lepshia asüngdangtsü.