Race Course Road agi 7, Lok Kalyan Marg ta melener

New Delhi, September. 21 (Agencies): Delhi nung Ato kilonser ki, koba dang 7, Race Course Road ta ajar, iba tenüng ‘Lok Kalyan Marg’ ta melenogo.
“Lok Kalyan (nüburtem welfare) dak alia tuluba kecha mali aser ajaki ibaji aginer,” ta BJP Lok Sabha MP, Meenakshi Lekhi-i ashi.
Tamalen Meenakshi-i shidi ka ajanga, Race Course Road ya India sobaliba den meputep, ta shia ‘Ekatma Marg’ ta melentsü benoka liasü.
Ano Delhi Chief minister,  Kejriwal-ibo Guru Gobind Singh Marg ta melentsü benoka liasü.
“Sikh nunger teshimtet telok aika kü dangi aru, ajisüaka iba senden nung timbakati Lok Kalyan Marg ta melennüa liasü,” ta Kejriwal-i ashi.
Yaküm küma Ato kilonser ki anasa Aurangzeb Road agi taoba linük Tir, APJ Abdul Kalam ta melena liasü.
Iba nüngjaji BJP lenir, Mahesh Girri-i benoka liasü. Mahesh-i, “Mughal yimsüsür, Aurangzeb ji taochi maket lenir ka liasü, anungji pa metushitsüla,” ta jembia liasü. Ajisüaka putiotsü  mongintemibo, ibaji putiotsü shilem ka, anungji memelentsüla, ta ashi.
Ano Akbar Road agi Maharana Pratap Marg ta melentsü benoka liasü saka sorkari magizük. Taküm küm tetenzüklen Gurgaon agi Gurugram ta melenba ajanga aikati sorkar aitsüogo.