Raebareli nung broiler apokba lendong nung nisung 10 pokset

Rae Bareli (Uttar Pradesh), November 01, 2017: Bodhbarnü Rae Bareli nung aliba NTPC indang  Unchahar Thermal Power plant nung boiler ka apokba sülen arongba noksa nung angur. 

Rae Bareli, November 01 (Agencies): Bodhbarnü Uttar Pradesh kübok Raebareli nung aliba NTPC indang Unchahar Thermal Power station nung broiler pipe ka apokba lendong nung nisung 10 pokset, aser nisung 100 jungnüa yiruogo, ta osang ka ajanga metetdaktsü.
Osang angazükba agi, tanü nikongdang 4:00 ako meta 500MW power unit nung unit no 6buba apokba mapang nung idakji aayanger nisung noklang aika liasü.
Tawa NTPC-i iba unit ji amenoka liasü
Tang Uttar Pradesh chief minister, Yogi Adityanath, Mauritius nung sentong ka nung dendar, aser pai asürtem kibong shia nem sen lakh anana agütsütsü, mejungi yirua alir shia nem sen 50,000 aser tera yirua alir shia nem sen 25,000 agütsütsü, ta sangdong.
Paisa home department ketdangsertem dang iba tesem jagi oa teyaritep maparen inyaktsü tuyuogo. Ano principal secretary home, Arvind Kumar leniba nung police department nungi ketdangsertema iba tesem jagi oa teyaritep mapa inyak.
Ano state medical department danga iba tesem jagi akokba tashi ambulances aika yoktsü tuyu. Tang yirua alir aika Lucknow nung aliba King George’s Medical University nung yaridar aser kar Raebareli nung aliba mozüki balala nung yaridar.
Chief Medical Officer, Rae Bareli, KK Singh-i, tang tashi nung tasümang 8 mozüki tongogo, aser ano aika asütsüa akok, ta ashi.