Rafael Nadal Barcelona Open semifinal-i iogo

Barcelona, April 23 (Agencies): Spain nunger tennis asayar mongin, Rafael Nadal-i par quarterfinal asaya koka tang tasayadak Barcelona Open tennis asayamong semifinal asayatsü jenjang yashi, Hokolbar nü ajangzükogo.
Tan agi Barcelona Open takok marok 9 buba agizüktsü alizüng ayusang, Nadal-i yashi points 6-2 7-6(1) ngua, Italy nunger Fabio Fognini quarterfinal asaya nung tsükdaktsü.
Nadal-i Monte Carlo tennis asayamong takok maroka taoba hopta agizükba osang jangjaogo.
Taruba May ita asayatsü ayongba French Open takok marok agizüka, iba takok marok 10 benbuba agizüker akümtsü alizüng ayusang, Nadal-i Russia nunger Andrey Kuznetsov mesüra Germany nunger Philipp Kohlschreiber na rong nung ka den semifinal asayatsü.
Ano külen, Japan nunger Kei Nishikori-ia yashi Ukraine nunger Alexandr Dolgopolov madak takok ngua, France nunger Benoit Paire den semifinal asayatsü jenjang anguba osang jangjaogo.