Rafael Nadal-i Hamburg Open marok benogo

Hamburg, August, 02 (Agencies) : Spain nungi tennis asayar rongnung tajungtiba, Rafael Nadal-i Deobar nü Hamburg nung bet-at-home Open asayamung nung Fabio Fognini madak 7-5, 7-5 agi takok ngua iba asayamung marok benogo.
“Ni tesüiba mapang anaben tashi pa makok anungji tan-a terabo saaka asayatsü ta ni meteta liasü. Ni tan tatembangbuba asaya nung kanga bendanga agüja asayaogo aser ibaji ajanga ni iba tongtibang takok ya angu,” ta Nadal-i ashi.
Asaya tenzüker minute 12 tsüngda nung Fognini-i Nadal break süja 1-0 agi Nadal dang jenjang tajungba aküm.
Iba sülen Nadal-i tanabuba set nung Fognini break süja 3-1 aküm. Ajisüaka Fognini-isa ano Nadal break sütsü. Tenapronglai kanga meranga asayaba ajanga tereprangertema kanga jangratemdakja liasü.
Yamaji atsütepa asayayonga orr tatemsa Nadal-i iba takok tulu ngutet.
“Joko hard-court mongpu tenzükogo, anungji otsü balaka akümtsü. Aji oda süaka ni tanü amai kanga bendanga agüja aser shisadanga asayatsü. Ibaji dang masü saka tanü takok anguba yagi ni tali ajemalua kümdaktsür aser tashi itshidaktsür. Iba den külemi Emirates ATP nunga ni Top 8 jenjang tongogo,” ta paisa ashi.
“Ni iba asayamung nung junga asayatetba asoshi kanga pelar. Tanü asaya ya kanga tasak liasü,” ta Fognini-i ashi.