Rafale ajanga China, Pak dang India jenjang tajungba akümtsü: IAF

New Delhi, September 30 (Agencies): Hombarnü IAF tongti, Marshal RKS Bhadauria-i, Rafale tayimtsü ajanga Indian Air Force (IAF) jenjang tajungba küma Pakistan aser China na ajatettsü, ashi.
Bhadauria-i 26buba IAF Chief mapa agizükba sülen osangbenertem den jembidang pai, “Rafale ya raraba tayimtsü tajung ka lir, kodang asenoki iba ya amshi tenzükdir iba ya ajanga operations tajungba akümtsü, aser kodang iba tayimtsü ya SU-30 aser tanga tayimtsü den külemi amshidir ibaji ajanga Pakistan aser China na dang nungi asenok jenjang tajungba akümtsü,” ta metetdaktsü.
Sen crore 60,000 agi France dang nungi Rafale tayimtsü 36 alizüktsü atema jembir Indian negotiation team Chairman ji Bhadauria liasü, aser item tayimtsü alitsü atema tezüngzüktep agiba nung pai tongti shilem agiogo. Rafale tayimtsü alitsü atema 2016 küm tezüngzüktep agia liasü.
Mezüngbuba Rafale aircraft ji France nung India Defence Minister, Rajnath Singh-i agizüktsü aser iba tayimtsü tail number ji RB-01 asütsü.
Tanep Bhadauria-i IAF tongti menden agizükba sülen pai National War Memorial semdanga taküm tenla agüja asür sepaitem nem akhüm agütsü.
Taküm IAF-i Pakistan kübok Balakot amakba dak sendakba nung Bhadauria-i, “Raratsü atema IAF renema liasü. Iba jakdang-a onok renema liasü, aser tarutsü nunga tayongzükba balala atema onok renema atatsü,” ta metetdaktsü.