Rafale Deal ken o nung PM Modi-i ola adoktsüla: Surjewala

Mongputeni/October 17 (Agencies): France linük dang nungi Rafale tayimtsü alitsü atema sorkari Reliance Defence nem contract agütsüba osang tasen ka jungkai adokba sülen tanü Congress Party-i, Ato kilonser, Narendra Modi-i par tembartem nem tajangzük agutsür, ta shia iba ken o nung pai ola adoktsü mapang tongogo, ta ashi.
French blog Portail Aviation osang nung ajemdaker Congress party otongdar, Randeep Singh Surjewala-i, iba osangji ajanga Modi-i Dassault Aviation den tezüngzüktep yanglua ozüng alema par tembar tajangzük ngudaktsüba jungkai adoktsür, ta ashi.
French blog ajanga Rafale-maker Dassault indang union ana– CFDT aser CGT documents sangdong.
Dassault Aviation Chief Operating Officer, Loik Segalenn-i tayimtsü alitsü atema tezüngzüktep yanglutsü asoshi union anati Reliance Defence nem iba contact agutsütsüsa akum, ta ashi.
Surjewala-isa, French blog ajanga taoba mapang France Tir, Francois Hollande-i “India sorkari Dassault dang Rafale den tezüngzüktep agitsü atema benok, iba nungji France-i inyaktsüsa kecha maliasü” ta ashi, ta metetdaktsü.
“Nagpur nung Make in India atema enterprise “Dassault Reliance Aerospace” benoka liasü. Segalenn-i ashiba agi, Rafale India tezüngzüktep agitsü atema Dassault-Aviation-i ibaji agizüktsüsa akum ta shiogo. Make In India atema Rafale India contract yanglutsüsa akum,” ta pai ashi.
Congress leniri, “Hollande-i French outlet ka dang Modi-i iba tezüngzüktep agitsü atema Reliance Defence benok ta ashiba sülen tang agi asembenbuba iba osang jangjar,” ta ashi.
BJP minister temi, Dassault Aviation-i offset partner shim, ta jembia aruba dak sendakba nung, Congress-i, “Rafale India export contract atema Dassault-Aviation-i iba tezüngzüktep agizüktsüsa akum ta Segalenn-i kechiba jembi?” ta asüngdang.
“Sen crore aika jenjang Rafale ochimashi ken o nung Modi sorkari ochimashi inyakba jungkai adokogo. Anungji Ato kilonser Modi-i ola adoktsü atema mapang tongogo,” ta Surjewala-i ashi.