Rafale deal onük nung opposition medendaktsütsü: Defence Minister

New Delhi, Rongjui/September 14 (Agencies): Rafale deal ken o mangatettep tuluba adokba mapang ka nung tanü Union Defence Minister, Nirmala Sitharaman-i, raraba tayimtsü alizükba dak sendakba nung opposition medendaktsütsü, ta metetdaktsü.
Laisa, iba onük nung opposition dendaktsütsü metemsü, kechiyong linük defence atema renemshiba nung parnoki tenüng menüktsüogo, ta ashi.
China aser Pakistan nati raraba tayimtsü alia linük ana tesendaktep tajungba akumba dak sendakba nung lai, rongdak mapang amshitsü atema Rafale jets indang squadrons ana alizüktsü atema sorkari telemtetba agiogo, ta metetdaktsü.
France linük dang nungi Rafale fighter jets 36 ji sen aikati alizükogo, aser iba nungji ochimashi lir, ta shia Congress Party leniba nung opposition-i Narendra Modi-i aniba sorkar aitsüogo.
Osangbenertem den jembidang Union Minister, Sitharam-i, “Parnok jaoker rasa-a ashitsü temsüa ali asü? UPA sorkar mapang memelungba onük ka nung parnoki linük nüburtem dang yazü jembir. Ochimashi lir ta shia nenoki (opposition) tai tongloktsür. Air force renemshitsü atema nenoki mebilem,” ta ashi.
2005 küm Congress lenir aser taoba mapang UPA sorkar nungi Ato kilonser, Manmohan Singh-i US den nuclear tezüngzüktep agitsü atema Opposition jaoka liasü aser iba dak sendakba nung osangbeneri, NDA sorkaria yamaji inyaktsü asü? ta asüngdangba langzüdang Sitharaman-i, “Iba tezüngzüktep (Rafale deal) yabo linük ana sorkar tsüngda agiba tezüngzüktep ka lir,” ta ashi.
“Nenok (Opposition)-i onok dang aika asüngdangogo aser ni Parliament nung telangzüba agutsüogo. Anungji kechiba ni parnok jaoktsü. Ni parnok jaok nunga parnok dang kechi ashitsü?” ta lai asüngdang.
Laisa, Rafale ya Bofors masü, kechiyong iba tezüngzüktep agiba nung tiyongtsüi aita inyakertem maden, ta shisem.