Rahi Sarnobat 25 Metre Pistol khatepba nung Gold angu

Luroi/August 22, 2018 (Agencies): Asian Games 2018 asaya tenzüker anogo pezübuba tashi nung India nunger asayartemi takok tajung ngua odar. Yamaji tanü tetsürtem 25-Metre Pistol event nung arishi küm 27 tain Rahi Sarnobat-i otsü tasen ka yanglua gold medal koktetogo. Lai India nunger tsürtem rongnungi Asian Games shooting asaya nung mezüngbuba gold medal koktetogo.
Final asaya nung Rahi Sarnobat aser Thailand tsür Naphaswan Yangpaiboon napronglai point 34 nguteta tie asü. Iba sülen mezüngbuba shoot-off round nunga tenapronglai 4-4 nguteta tie asü. Tanabuba round nung Rahi Sarnobat-i asemben tashi khashi aser la den tokteperi khen dang khashia lai iba asaya nung gold medal koktetogo.
Bajrang Punia aser Vinesh Phogat na sülen arishi küm 16 tain Saurabh Chaudhary-i India atema gold medal koktetba sülen tang Rahi-i India nunger atema gold medal pezübuba koktetogo.
Kasa mapang nung Maharashtra soakari tanü Rahi Sarnobat nem senpet sen lakh 50 agütsütsü sangdongogo.
Maneni Rasemnü kasa asayamung nung Naorem Roshibina Devi, Santosh Kumar, Surya Bhanu Partap Singh aser Narender Grewal nungeri pei tata asaya nung bronze medal kokteta India nunger medal tally nung medal tali bendenloktsüogo. Naorem Roshibina Devi-i tetsür wushu Sanda 60kg category nung bronze medal angu. Santosh Kumar-ia tebur wushu Sanda 56kg category nung bronze medal angu. Surya Bhanu Partap Singh ya India nunger wushu asayar rongnungi bronze medal angur tasembuba aküm. Pai Tebur wushu Sanda 60kg category nung iba medal angu. Maneni Narender Grewal-ia tebur Wushu Sanda 65kg category nung bronze medal ka koktetogo.
India nunger asayartemi Asian Games nung tang tashi nung medal 11 kokteta lir aser item rongnung gold 4, silver 3 aser bronze 4 densema lir.