Rahul aliba tesem metetdaktsür nem senpet lakh 1 agütsütsü: BJP

Bhopal (Madhya Pradesh), June 23 (Agencies): Congress tatong Tir, Rahul Gandhi-i mapang shia ainlen amungba atema asaya menüja Madhya Pradesh nung BJP lenir kati, Congress lenir Rahul kong ali’ar jangjar nem senpet lakh ka agütsütsü ta sangdong.

Madhya Pradesh BJP otongar, Vijendra Singh Sisodia-i, Rahul alitak shiang aser sen lakh ka agiang” ta sangdong.

Madhya Pradesh Urja Vikas Nigam Mendenbuba, Sisodia-isa, “Ita ishika tejaklena Rahul Gandhi bendangleni oa liasü, iba mapang nung Congress lenirtemi pa shisa lemsatepba senden kati ao, aser pa tashi taliba itshir arutsü ta jembi. Ajisüaka Rahul ji Thailand, Malaysia, Bangkok aser Singapore-i oa liasü ta tesülen ang jangja,” ta ashi.

“Tangbo Congress lenirtemi pa tashi ajema kümdar ta bilemer, iba yongji pa tashi itshitsü atema ano bendangleni ao. Pa kongi ao. Pai shiba ajuru. Pa koma tashi itshir. Pa anogo kwi atema tashi itshir. Linüki ibaji metetner,” ta paisa ashi.

Ajisüaka iba oji meyipja Congress otongdar, Ravi Saxena-i, “BJP lenirtem Rahul phobia (tsübuba) ajanga shiranger,” ta ashi.

“Sisodia-i Rahul aliba tesem metetnüra pai paji (Rahul) SPG-i anüker ka lir ta metettsüla, aser tanüker aliba nisungtem senzübaji meteta lir. Pa aliba tesem metettsü atema pai Union Home Minister Rajnath Singh nem sen lakh kaji agütsütsüla,” ta Saxena-i ashi.

Hombarnü Rahul arishi küm 46 ajungba anogomung nung pai, pa anogo ishika atema ainleni aor ta ashi, ajisüaka pai iba dak alia kecha melemsatep.

Yaküm Parliament nung Budget senden telitak mapang Rahul anogo 56 tashi bendanglen amungba ajanga BJP-i pa kanga aija liasü.